धाराशिव – काल ९५ हजारांची लाच घेताना रंगेहाथ पकडलेल्या पोलीस निरीक्षकाच्या कहाणीने आज एक असे नाट्यमय वळण घेतले आहे, की ऐकणाऱ्यालाही घाम फुटावा! ज्याच्या नावाने गुन्हेगार थरथर कापायचे, तोच पोलीस निरीक्षक मारोती शेळके आज चक्क एखाद्या सराईत गुन्हेगाराप्रमाणे लाचलुचपत प्रतिबंधक विभागाच्या (ACB) कार्यालयातून पसार झाला. या घटनेने संपूर्ण पोलीस दलात एकच खळबळ उडाली आहे.
पोलिसांच्या हातावर तुरी, शहरात थरार!
काल लाच स्वीकारल्याप्रकरणी गुन्हा दाखल करण्याची प्रक्रिया सुरू असताना, पी.आय. शेळके यांनी संधी साधली. क्षणार्धात त्यांनी अधिकाऱ्यांच्या हातावर तुरी देऊन धूम ठोकली. ज्यांनी आयुष्यभर आरोपींना पळताना पाहिले, त्यांच्यावरच आज आरोपीसारखे पळण्याची वेळ आली. शेळके यांच्या पलायनाने ACB अधिकाऱ्यांची प्रचंड धावपळ उडाली.
पोलिसांनी केला पोलिसाचाच फिल्मी स्टाईल पाठलाग
यानंतर धाराशिवच्या रस्त्यांवर सुरू झाला एक थरारनाट्य! पुढे लाचखोर पी.आय. आणि मागे त्याला पकडण्यासाठी धावणारे ACB चे पोलीस. शहरातील गजबजलेल्या लेडीज क्लब समोरील रस्त्यावर पोलिसांचा पोलिसाला पकडण्यासाठी चाललेला हा फिल्मी स्टाईल पाठलाग पाहून नागरिकही अवाक् झाले. हा संपूर्ण थरार रस्त्यावरील सीसीटीव्ही कॅमेऱ्यात कैद झाला आहे. अखेर, अथक पाठलागानंतर ACB च्या पथकाने शेळके यांच्या मुसक्या आवळल्या आणि या पलायननाट्यावर पडदा पडला.
का झाली होती कारवाई?
एका आत्महत्या प्रकरणात दाखल गुन्ह्यात आरोपीवर कारवाई न करण्याच्या मोबदल्यात, शेळके यांनी महिला पोलीस अंमलदार मुक्ता लोखंडे यांच्यामार्फत १ लाख रुपयांची मागणी केली होती. तडजोडीअंती ९५ हजार रुपये स्वीकारताना लोखंडे यांना रंगेहाथ पकडले होते. या प्रकरणात शेळके यांना लाचेस प्रोत्साहन दिल्याबद्दल ताब्यात घेतले होते.
आता या पलायननाट्यामुळे शेळके यांच्या अडचणीत आणखी वाढ झाली असून, त्यांच्यावर लाचखोरीच्या गुन्ह्यासोबतच शासकीय ताब्यातून पळून जाण्याचाही गुन्हा दाखल होण्याची शक्यता आहे. या घटनेने पोलीस दलाच्या कार्यपद्धतीवर आणि प्रतिष्ठेवर गंभीर प्रश्नचिन्ह निर्माण केले आहे.
Video
