वाखरवाडीच्या समाज मंदिरातच जुगाराचा अड्डा; ढोकी पोलिसांच्या छाप्यात नऊ जण ताब्यात

ढोकी  – गावातील सामाजिक व सांस्कृतिक कार्यक्रमांसाठी असलेल्या समाज मंदिरातच जुगार अड्डा चालवला जात असल्याचा धक्कादायक प्रकार ढोकी पोलिसांनी उघडकीस आणला आहे.धाराशिव तालुक्यातील वाखरवाडी येथील समाज मंदिरात सुरू असलेल्या तिरट मटका अड्ड्यावर शनिवारी दुपारी छापा टाकून पोलिसांनी नऊ जणांना ताब्यात घेतले. त्यांच्याकडून रोख रकमेसह एकूण ३२,१०२ रुपयांचा मुद्देमाल जप्त करण्यात आला आहे.

ढोकी पोलिसांना वाखरवाडी येथील समाज मंदिरात मोठ्या प्रमाणावर जुगार खेळला जात असल्याची गुप्त माहिती मिळाली होती. या माहितीच्या आधारे, पोलिसांनी शनिवारी, दि. २६ जुलै रोजी दुपारी सव्वातीन वाजण्याच्या सुमारास सदर ठिकाणी छापा टाकला.

या कारवाईत, नानासाहेब भीमराव ढवारे (वय ३८) आणि इतर आठ जण तिरट मटका नावाचा जुगार खेळताना रंगेहाथ सापडले. पोलिसांनी घटनास्थळावरून जुगाराचे साहित्य आणि रोख रक्कम असा एकूण ३२,१०२ रुपयांचा मुद्देमाल जप्त केला आहे. सार्वजनिक ठिकाणी, विशेषतः समाज मंदिरात जुगार अड्डा सुरू असल्याने परिसरात खळबळ उडाली आहे.

याप्रकरणी, ढोकी पोलिसांनी नानासाहेब ढवारे यांच्यासह एकूण नऊ जणांविरुद्ध महाराष्ट्र जुगार प्रतिबंधक कायद्याच्या कलम १२ (अ) अन्वये गुन्हा दाखल केला असून, पुढील तपास सुरू आहे.