धाराशिव : येथील ज्ञानेश्वर मंदिराच्या पाठीमागे असलेल्या मुक्तेश्वर कॉलनीमध्ये एका ३४ वर्षीय विवाहितेस चारित्र्याच्या संशयावरून शिवीगाळ करत काठीने व लाथाबुक्क्यांनी मारहाण करून जीवे मारण्याची धमकी दिल्याचा धक्कादायक प्रकार समोर आला आहे. ही घटना गुरुवार, दि. ११ सप्टेंबर २०२५ रोजी दुपारी २ वाजण्याच्या सुमारास घडली.
याप्रकरणी पीडित महिला, प्रणिता जयशंकर काळे (वय ३४) यांनी दिलेल्या फिर्यादीवरून आनंदनगर पोलीस ठाण्यात पतीसह सासरच्या पाच जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, पीडितेचे पती जयशंकर बाळासाहेब काळे यांच्यासह सासरचे सदस्य गौरीशंकर बाळासाहेब काळे, विजया बाळासाहेब काळे, अश्विनी काळे, आणि बाळासाहेब काळे (सर्व रा. मुक्तेश्वर कॉलनी, धाराशिव) यांनी प्रणिता यांच्या चारित्र्यावर संशय घेतला. यावरून झालेल्या वादात आरोपींनी त्यांना शिवीगाळ करत काठीने आणि लाथाबुक्क्यांनी मारहाण केली, तसेच जीवे ठार मारण्याची धमकी दिली.
या घटनेनंतर पीडितेने शनिवारी, दि. १३ सप्टेंबर २०२५ रोजी आनंदनगर पोलीस ठाण्यात तक्रार दाखल केली. त्यांच्या फिर्यादीवरून पोलिसांनी आरोपींविरुद्ध भारतीय न्याय संहिता कलम ११८(१), ११५(२), १९१(२)(३), १९०(३), ३५२, ३५१(२),(३), आणि ७४ अन्वये गुन्हा नोंदवला आहे. प्रकरणाचा पुढील तपास पोलीस करत आहेत.
