तुळजापूर: लहान मुलांच्या किरकोळ भांडणाचे रूपांतर मोठ्या वादात होऊन एका तरुणाला लाथाबुक्क्यांनी आणि काठीने गंभीर मारहाण केल्याची घटना काक्रंबा (ता. तुळजापूर) येथे घडली आहे. याप्रकरणी तुळजापूर पोलीस ठाण्यात एकाच कुटुंबातील तिघांविरुद्ध गुन्हा दाखल करण्यात आला आहे.
मिळालेल्या माहितीनुसार, फिर्यादी यशपाल प्रकाश पांडागळे (वय ३८, रा. काक्रंबा) आणि आरोपी यांच्यात शनिवारी, ७ फेब्रुवारी २०२६ रोजी दुपारी ४:३० वाजण्याच्या सुमारास वाद झाला. लहान मुलांच्या भांडणाचे कारण पुढे करून आरोपींनी फिर्यादीला गाठले. वादाचे रूपांतर शिवीगाळ आणि मारहाणीत झाले.
या वादात आरोपी नागनाथ जालींदर पांडागळे, प्रिती नागनाथ पांडागळे आणि धम्मपाल पांडागळे (सर्व रा. काक्रंबा) यांनी यशपाल यांना अश्लील शिवीगाळ करत लाथाबुक्क्यांनी मारहाण केली. इतकेच नव्हे तर, काठीने जबर प्रहार करून त्यांना जखमी केले.
या घटनेनंतर यशपाल पांडागळे यांनी तुळजापूर पोलीस ठाण्यात धाव घेऊन तक्रार दिली. त्यांच्या फिर्यादीवरून पोलिसांनी तिन्ही आरोपींविरुद्ध भारतीय न्याय संहिता (BNS) कलम ११८(१), ११५(२), ३५२ आणि ३(५) अन्वये गुन्हा नोंदवला आहे. या प्रकरणाचा पुढील तपास तुळजापूर पोलीस करत आहेत.
