धाराशिव: जिल्ह्याचे ‘मिनी मंत्रालय’ म्हणून ओळखल्या जाणाऱ्या धाराशिव जिल्हा परिषद आणि जिल्ह्यातील आठ पंचायत समित्यांच्या निवडणुकीसाठी आज उत्साहात मतदान पार पडले. संपूर्ण जिल्ह्याचे लक्ष लागून राहिलेल्या या निवडणुकीत सरासरी ६५.४२ टक्के मतदान झाल्याचा प्राथमिक अंदाज वर्तवण्यात आला आहे. आता सर्वांच्या नजरा ९ फेब्रुवारी रोजी होणाऱ्या मतमोजणीकडे लागल्या आहेत.
जिल्ह्यातील एकूण ११,४५,८८८ मतदारांपैकी अंदाजे ७,४९,६५१ मतदारांनी आपल्या मतदानाचा हक्क बजावला. सकाळपासूनच मतदान केंद्रांवर मतदारांच्या रांगा पाहायला मिळाल्या. विशेषतः ग्रामीण भागात मतदारांमध्ये मोठा उत्साह दिसून आला.
या निवडणुकीत भूम तालुक्यात सर्वाधिक ७१.६५ टक्के मतदान झाले असून, त्याखालोखाल परांडा तालुक्यात ७१ टक्के मतदान झाले आहे. तर सर्वात कमी मतदान लोहारा तालुक्यात (५७.३६ टक्के) नोंदवण्यात आले आहे.
तालुकानिहाय मतदानाची टक्केवारी:
निवडणूक विभागाकडून मिळालेल्या प्राथमिक माहितीनुसार, तालुकानिहाय मतदानाची आकडेवारी खालीलप्रमाणे आहे:
| तालुका | मतदानाची टक्केवारी (%) |
| भूम | ७१.६५ |
| परांडा | ७१.०० |
| वाशी | ६९.६० |
| कळंब | ६६.६३ |
| तुळजापूर | ६४.६७ |
| धाराशिव | ६३.७२ |
| उमरगा | ६३.०० |
| लोहारा | ५७.३६ |
९ फेब्रुवारीला होणार फैसला
जिल्हा परिषदेच्या सत्तेच्या चाव्या कोणाकडे जाणार आणि पंचायत समित्यांवर कोणाचे वर्चस्व राहणार, याचा फैसला आता मतपेटीत बंद झाला आहे. सोमवार, ९ फेब्रुवारी रोजी मतमोजणी होणार असून, दुपारपर्यंत निकालाचे चित्र स्पष्ट होण्याची शक्यता आहे. या निकालाकडे केवळ राजकीय नेतेच नव्हे, तर संपूर्ण जिल्ह्याचे लक्ष लागून राहिले आहे.
