भूम : कर्ज घेतलेल्या ३० हजार रुपयांच्या मोबदल्यात एका महिन्यात दुप्पट रक्कम वसूल करूनही, आणखी साडेतीन लाख रुपयांची मागणी करत तरुणाला धमकावणाऱ्या सावकारांच्या टोळीवर भूम पोलिसांनी गुन्हा दाखल केला आहे. या प्रकारामुळे परिसरात अवैध सावकारी करणाऱ्यांचे धाबे दणाणले आहेत.
फिर्यादी विनीत सुनील शेटे (वय २०, रा. कसबा भूम) यांनी आरोपींकडून ३०,००० रुपये व्याजाने घेतले होते. या रकमेवर आरोपींनी दर आठवड्याला २० टक्के या अवाढव्य दराने व्याज आकारले. विनीत यांनी एका महिन्यात तब्बल ६०,००० रुपये परत करूनही आरोपींचे समाधान झाले नाही.
३० जानेवारी ते १० फेब्रुवारी २०२६ दरम्यान, आरोपींनी फिर्यादीला गाठून आर्थिक व्यवहाराच्या कारणावरून शिवीगाळ केली आणि लाथाबुक्क्यांनी मारहाण केली. “जर साडेतीन लाख रुपये दिले नाहीत, तर तुला उचलून घेऊन जाऊ,” अशी धमकीही त्यांनी विनीतला दिली.
या प्रकरणात कल्याण नगर, भूम येथील एकाच कुटुंबातील ४ जणांवर गुन्हा दाखल झाला आहे:
१. दशरथ उर्फ दादा काळे २. बापू आप्पा काळे ३. छायाबाई दशरथ काळे ४. सरस्वती बापू काळे
विनीत शेटे यांनी दिलेल्या फिर्यादीवरून भूम पोलीस ठाण्यात आरोपींविरुद्ध भारतीय न्याय संहिता (BNS) कलम ३०८(२), ३५२, ३(५) आणि महाराष्ट्र सावकारी (नियमन) अधिनियम २०१४ च्या कलम ३९, ४४ व ४५ अन्वये गुन्हा नोंदवण्यात आला आहे.
