आंबी: कत्तलीसाठी जनावरांची निर्दयतेने आणि बेकायदेशीर वाहतूक करणारे वाहन आंबी पोलिसांनी पकडले आहे. ही कारवाई १३ फेब्रुवारी रोजी सायंकाळी करण्यात आली असून, याप्रकरणी एका तरुणावर गुन्हा दाखल करण्यात आला आहे.
मंगेश राम देशमाने (वय २५, रा. खडकपुरा गल्ली, खर्डा, ता. जामखेड, जि. अहिल्यानगर) असे गुन्हा दाखल झालेल्या आरोपीचे नाव आहे.
पोलिसांनी दिलेल्या माहितीनुसार, १३ फेब्रुवारी २०२६ रोजी सायंकाळी ६:४० वाजण्याच्या सुमारास आंबी पोलीस हद्दीत वाहनांची तपासणी सुरू होती. त्यावेळी ‘छोटा हत्ती’ (क्रमांक एमएच १६ डी.पी. ०२२५) या वाहनातून जनावरांची वाहतूक होत असल्याचे पोलिसांच्या निदर्शनास आले. पोलिसांनी वाहन थांबवून तपासणी केली असता, त्यात गोवंशीय जातीची दोन वासरे आणि एक रेडकू आढळून आले.
आरोपीने या जनावरांच्या चारा-पाण्याची कोणतीही व्यवस्था न करता, त्यांना एकाच वाहनात निर्दयतेने कोंबून कत्तलीसाठी नेत असल्याचे तपासात उघड झाले. पोलिसांनी वाहनासह एकूण २ लाख ३३ हजार रुपये किमतीचा मुद्देमाल जप्त केला आहे.
याप्रकरणी आंबी पोलीस ठाण्यात सरकारतर्फे दिलेल्या फिर्यादीवरून आरोपी मंगेश देशमाने याच्याविरुद्ध प्राण्यांना क्रूरतेने वागवण्यास प्रतिबंध अधिनियम कलम ११(१)(ए), ११(१)(डी), ११(१)(ई) तसेच महाराष्ट्र पशु संरक्षण अधिनियम कलम ५(ब) अन्वये गुन्हा दाखल करण्यात आला आहे. पुढील तपास आंबी पोलीस करत आहेत.
