परंडा: गाडीला कट मारल्याच्या कारणावरून पाच जणांच्या टोळक्याने एका तरुणावर लोखंडी कोयता, रॉड आणि लाकडी दांडक्याने जीवघेणा हल्ला केल्याची धक्कादायक घटना सोनारी (ता. परंडा) येथील रेस्ट हाऊस चौकात घडली. या मारहाणीदरम्यान हल्लेखोरांनी एकाची सोन्याची साखळी देखील हिसकावून नेली. याप्रकरणी आंबी पोलीस ठाण्यात पाच जणांवर गंभीर कलमांन्वये गुन्हा दाखल करण्यात आला आहे.
रवी परमेश्वर मांडवे (वय ३७, रा. सोनारी, ता. परंडा, जि. धाराशिव) असे या हल्ल्यात गंभीर जखमी झालेल्या फिर्यादीचे नाव आहे. याप्रकरणी प्रशांत शिंदे, बाळू शिंदे (दोघे रा. साकत, ता. परंडा) आणि त्यांचे इतर तीन अनोळखी साथीदार अशा एकूण पाच जणांवर गुन्हा दाखल झाला आहे.
पोलिसांनी दिलेल्या माहितीनुसार, ४ मार्च २०२६ रोजी रात्री ९ वाजेच्या सुमारास रवी मांडवे हे सोनारी येथील रेस्ट हाऊस चौकात असताना हा प्रकार घडला. गाडीला कट मारल्याच्या कारणावरून आरोपींनी गैरकायद्याची मंडळी जमवून रवी यांच्याशी वाद घातला. आरोपींनी त्यांना शिवीगाळ करत लाथाबुक्क्यांनी मारहाण करण्यास सुरुवात केली. त्यानंतर सोबत आणलेल्या लोखंडी रॉड, लोखंडी कोयता आणि लाकडी दांडक्याने रवी यांना बेदम मारहाण करून गंभीर जखमी केले व जिवे ठार मारण्याची धमकी दिली. याच मारहाणीच्या झटापटीत आरोपींनी तिथे असलेले बिभीषण हांगे यांच्या गळ्यातील सोन्याची साखळी जबरदस्तीने ओढून नेली.
या थरारक घटनेनंतर जखमी रवी मांडवे यांनी शनिवारी (दि. ७ मार्च) आंबी पोलीस ठाण्यात धाव घेत फिर्याद दिली. या प्रथम खबरेवरून पोलिसांनी प्रशांत शिंदे, बाळू शिंदे आणि इतर तिघांवर कलम ११८(२), ११८(१), ११५(२), ३५१(२), ३५१(३), ३५२, ११९(१), १८९(१), १९०, १९१(२), १९१(३) अन्वये गुन्हा नोंदवला आहे. भरचौकात झालेल्या या राडेबाजीमुळे परिसरात भीतीचे वातावरण असून, आंबी पोलीस या प्रकरणाचा पुढील तपास करत आहेत.
