कळंब : नाचताना पायावर पाय पडल्याच्या क्षुल्लक कारणावरून एका २२ वर्षीय तरुणाला शिवीगाळ करत लोखंडी कत्तीने मारहाण करून गंभीर जखमी केल्याची धक्कादायक घटना समोर आली आहे. भांडण सोडवायला आलेल्या भावांनाही यावेळी जीवे मारण्याची धमकी देण्यात आली. याप्रकरणी कळंब पोलीस ठाण्यात चार जणांविरुद्ध गुन्हा दाखल करण्यात आला आहे.
ही घटना ८ मार्च २०२६ रोजी दुपारी १२ ते १२.३० च्या सुमारास खेर्डा आणि उमरा पाटी दरम्यान घडली. स्वप्नील बालाजी लुगडे (वय २२, रा. खामकरवाडी, ता. वाशी, जि. धाराशिव) असे या मारहाणीत गंभीर जखमी झालेल्या फिर्यादी तरुणाचे नाव आहे.
पोलिसांनी दिलेल्या माहितीनुसार, फिर्यादी स्वप्नील आणि आरोपी हे एकाच गावातील आहेत. नाचत असताना स्वप्नीलचा पाय आरोपींच्या पायावर पडला. याच कारणाचा राग मनात धरून आरोपींनी स्वप्नीलला शिवीगाळ करत लाथाबुक्क्यांनी मारहाण करण्यास सुरुवात केली. तसेच, जवळ असलेल्या लोखंडी कत्तीने वार करून स्वप्नीलला गंभीर जखमी केले.
हे भांडण सोडवण्यासाठी स्वप्नीलचे चुलत भाऊ रणजित आणि योगेश हे मध्ये आले असता, संतापलेल्या आरोपींनी त्यांनाही शिवीगाळ केली आणि जीवे ठार मारण्याची धमकी दिली.
यांच्यावर झाला गुन्हा दाखल:
याप्रकरणी स्वप्नील लुगडे याने मंगळवारी (दि. १० मार्च) कळंब पोलीस ठाण्यात फिर्याद दिली. या तक्रारीवरून खालील चार आरोपींवर गुन्हा दाखल करण्यात आला आहे:
-
रोहित सदाशिव वाघमारे
-
विजय विष्णू सावंत
-
अजय नरसिंग वाघमारे
-
वैभव महादेव वाघमारे
(सर्व रा. खामकरवाडी, ता. वाशी, जि. धाराशिव)
या प्रथम खबरीवरून कळंब पोलिसांनी चारही आरोपींविरुद्ध भारतीय न्याय संहितेच्या (BNS) कलम ११८(२), १२६(२), ३५२, ३५१(३), ११५(२) आणि ३(५) अन्वये गुन्हा नोंदवला आहे. या प्रकरणाचा पुढील तपास पोलीस करत आहेत.
