वाशी : तालुक्यातील शेंडी शिवार परिसरात दरोडा टाकण्याच्या तयारीत असलेल्या पाच जणांच्या टोळीला गस्तीवर असलेल्या वाशी पोलिसांनी शिताफीने जेरबंद केले. या टोळीकडून दोन दुचाकी, घातक शस्त्रे आणि तिखट पावडर असा एकूण १ लाख ४० हजार रुपयांचा मुद्देमाल जप्त करण्यात आला आहे. ही कारवाई बुधवारी (ता. ११) मध्यरात्रीच्या सुमारास करण्यात आली.
बबन रंगनाथ शिंदे, लहु आबा शिंदे, तानाजी अशोक काळे, सोनु बबन शिंदे आणि सुभाष शिवाजी शिंदे (सर्व रा. पारा, ता. वाशी, जि. धाराशिव) अशी अटक करण्यात आलेल्या संशयित आरोपींची नावे आहेत.
वाशी पोलिसांनी दिलेल्या माहितीनुसार, शेंडी शिवारातील कमळेश्वर पारधी पिढीकडे जाणाऱ्या रस्त्याजवळ काही जण संशयास्पद हालचाली करत असल्याची आणि दरोडा टाकण्याच्या उद्देशाने पूर्ण तयारीनिशी एकत्र आल्याची माहिती पोलिसांना मिळाली होती. त्यानुसार बुधवारी रात्री साडेअकरा ते गुरुवारी (ता. १२) मध्यरात्री बारा वाजून दहा मिनिटांच्या दरम्यान पोलिसांनी या परिसरात सापळा रचला. यावेळी अंधाराचा फायदा घेऊन दरोड्याच्या तयारीत बसलेल्या पाचही जणांना पोलिसांनी झडप घालून ताब्यात घेतले.
आरोपींची झडती घेतली असता त्यांच्याकडे दरोड्यासाठी वापरण्यात येणारे साहित्य मिळून आले. यामध्ये दोन मोटारसायकली (एमएच २५ बीडी १३१० आणि एमएच २५ एआर ६३२०), चार लोखंडी कोयते, एक तलवार आणि लोकांच्या डोळ्यात फेकण्यासाठी कॅरीबॅगमध्ये आणलेली तिखट पावडर असा एकूण १ लाख ४० हजार रुपयांचा मुद्देमाल पोलिसांनी हस्तगत केला आहे.
या प्रकरणी वाशी पोलीस ठाण्याचे पोलीस हेड कॉन्स्टेबल बळीराम वसंतराव यादव (बक्कल नं. १५१६) यांनी दिलेल्या फिर्यादीवरून गुरुवारी (ता. १२) वाशी पोलीस ठाण्यात गुन्हा दाखल करण्यात आला आहे. पाचही आरोपींविरुद्ध भारतीय न्याय संहिता (BNS) कलम ३१० (४), (५) सह शस्त्र अधिनियम कलम ४/२५ अन्वये गुन्हा नोंदवण्यात आला असून, वाशी पोलीस या प्रकरणाचा अधिक तपास करत आहेत. या टोळीचा आणखी कोणत्या गुन्ह्यांत सहभाग आहे का, याचाही शोध आता पोलिसांकडून घेतला जात आहे.
