कळंब : फरीदनगर (डिकसळ, ता. कळंब) येथून एका १७ वर्षीय अल्पवयीन मुलाचे अज्ञात व्यक्तीने घरातून अपहरण केल्याची खळबळजनक घटना उघडकीस आली आहे. या प्रकरणी कळंब पोलीस ठाण्यात अज्ञाताविरुद्ध गुन्हा दाखल करण्यात आला आहे.
आयान अमजत पठाण (वय १७ वर्षे) असे अपहरण झालेल्या अल्पवयीन मुलाचे नाव आहे. या प्रकरणी त्याचे वडील अमजत जाफर पठाण (वय ४३, रा. फरीदनगर, तांदुळवाडी रोड, डिकसळ, ता. कळंब, जि. धाराशिव) यांनी पोलिसांत फिर्याद दिली आहे.
पोलिसांनी दिलेल्या माहितीनुसार, शनिवारी (ता. १४) सकाळी साडेदहा वाजण्याच्या सुमारास आयान हा स्वतःच्या घरी होता. त्यावेळी अज्ञात व्यक्तीने अज्ञात कारणासाठी त्याला घरातून पळवून नेले. मुलगा घरातून बेपत्ता झाल्याचे लक्षात आल्यानंतर कुटुंबीयांनी व नातेवाईकांनी त्याचा सर्वत्र शोध घेतला, मात्र तो कुठेही आढळून आला नाही.
अखेर या प्रकरणी अमजत पठाण यांनी सोमवारी (ता. १६) कळंब पोलीस ठाण्यात धाव घेत तक्रार दिली. त्यांच्या या फिर्यादीवरून कळंब पोलिसांनी अज्ञात व्यक्तीविरुद्ध भारतीय न्याय संहिता (BNS) कलम १३७(२) अन्वये अपहरणाचा गुन्हा दाखल केला आहे. या प्रकरणाचा पुढील तपास कळंब पोलीस करत आहेत. अल्पवयीन मुलाचे अपहरण झाल्याने परिसरात चिंतेचे वातावरण निर्माण झाले आहे.
