धाराशिव : चारा-पाण्याची कोणतीही व्यवस्था न करता कत्तलीच्या उद्देशाने गोवंशीय जनावरांची वाहनातून अत्यंत निर्दयीपणे वाहतूक करणाऱ्या एकावर धाराशिव शहर पोलिसांनी धडक कारवाई केली आहे. या कारवाईत पोलिसांनी जर्सी आणि गावरान गायींसह एक चारचाकी वाहन असा एकूण ४ लाख १५ हजार रुपयांचा मुद्देमाल जप्त केला आहे. ही घटना मंगळवारी (ता. १७) सकाळी अकरा वाजेच्या सुमारास धाराशिव शहरातील सैय्यदनगर भागात उघडकीस आली.
या प्रकरणी धाराशिव शहर पोलिसांनी सरकारतर्फे दिलेल्या फिर्यादीवरून मैनोद्दीन उमर शेख (वय ३७, रा. फकीरा नगर, वैराग नाका, धाराशिव) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, वासू-वैराग रोडवरील सैय्यदनगर भागात मंगळवारी सकाळी ११ वाजेच्या सुमारास पोलिसांना एक अशोक लेलँड कंपनीचे चारचाकी वाहन (क्र. MH 25 P 5718) संशयास्पद स्थितीत आढळून आले. पोलिसांनी या वाहनाची तपासणी केली असता, त्यात एक जर्सी गाय आणि एक गावरान गाय अत्यंत दाटीवाटीने आणि निर्दयीपणे बांधून ठेवल्याचे दिसून आले. या मुक्या जनावरांच्या चारा-पाण्याची कोणतीही सोय करण्यात आली नव्हती. ही जनावरे बेकायदेशीररीत्या कत्तलीसाठी बांधून ठेवल्याचे पोलिसांच्या निदर्शनास आले.
पोलिसांनी तत्काळ कारवाई करत चारचाकी वाहनासह दोन्ही गायी असा एकूण ४ लाख १५ हजार रुपयांचा मुद्देमाल जप्त केला. तसेच, जनावरांना क्रूरतेने वागवल्याप्रकरणी मैनोद्दीन शेख याच्याविरुद्ध प्राण्यांना क्रूरतेने वागवण्यास प्रतिबंध करण्याबाबतचा अधिनियम कलम ११(१)(बी) आणि महाराष्ट्र पशु संरक्षण अधिनियम ५(अ) अन्वये धाराशिव शहर पोलिस ठाण्यात गुन्हा नोंदवण्यात आला आहे. या घटनेचा पुढील तपास पोलिस करत आहेत.
