भूम : भूम शहरातील श्रीशंकर नगर भागात एका बंद घराचे गेट उघडून अज्ञात चोरट्यांनी सोन्या-चांदीचे दागिने आणि मोबाईल असा तब्बल ९८ हजार ७०० रुपयांचा ऐवज लंपास केल्याची घटना उघडकीस आली आहे. ही घरफोडी सोमवारी (ता. १६) सकाळी ते मंगळवारी (ता. १७) पहाटेच्या दरम्यान घडली. याप्रकरणी भूम पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, नारायण दत्तोबा नाईकनवरे (वय ३२, रा. श्रीशंकर नगर, भूम, जि. धाराशिव) यांचे घर बंद असल्याचे हेरून चोरट्यांनी डल्ला मारला. सोमवारी सकाळी ११ ते मंगळवारी पहाटे साडेतीन वाजेच्या दरम्यान अज्ञात व्यक्तीने त्यांच्या बंद घराचे मुख्य गेट उघडून आत प्रवेश केला.
घरामध्ये प्रवेश केल्यानंतर चोरट्यांनी सामानाची उचकापाचक केली. यावेळी स्वयंपाकघरातील एका डब्यात ठेवलेले २० ग्रॅम वजनाचे सोन्याचे दागिने, चांदीचे दागिने आणि एक मोबाईल फोन चोरट्यांच्या हाती लागला. हा सर्व ९८ हजार ७०० रुपये किमतीचा मुद्देमाल चोरून त्यांनी पोबारा केला. चोरीचा हा प्रकार लक्षात आल्यानंतर नारायण नाईकनवरे यांनी तत्काळ भूम पोलिस ठाण्यात धाव घेऊन प्रथम खबर दिली.
या फिर्यादीवरून पोलिसांनी मंगळवारी (ता. १७) अज्ञात चोरट्याविरुद्ध भारतीय न्याय संहितेच्या (BNS) कलम ३३१(४) आणि ३०५ अन्वये घरफोडीचा गुन्हा नोंदवला आहे. भरवस्तीत झालेल्या या चोरीमुळे परिसरात खळबळ उडाली असून, भूम पोलिस चोरट्यांचा शोध घेत आहेत.
