धाराशिव : शेकापूर (ता. जि. धाराशिव) येथील शेतशिवारात असलेल्या सोरोजीन कंपनीच्या स्टोअर यार्डमधून तब्बल ९ लाख ६५ हजार ७०० रुपये किमतीचे विद्युत तांब्याचे (कॉपर) केबल अज्ञात चोरट्यांनी लांबवल्याचा प्रकार समोर आला आहे. ही घटना जानेवारी २०२५ मध्ये घडली असून, या प्रकरणी गुरुवारी (ता. २० मार्च) धाराशिव शहर पोलिस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, २७ जानेवारी २०२५ रोजी सकाळी दहा वाजेच्या पूर्वी शेकापूर शिवारात हा चोरीचा प्रकार घडला होता. येथील सोरोजीन कंपनीच्या स्टोअर यार्डमध्ये ठेवण्यात आलेले दोन ज्युनिपर (एन २५२३४४६, एन २५२३४४७ नेसल) आणि त्यातील तब्बल ६२ विद्युत कॉपर केबलचे बंडल अज्ञात चोरट्यांनी लंपास केले. या चोरीला गेलेल्या साहित्याची एकूण किंमत ९ लाख ६५ हजार ७०० रुपये इतकी आहे.
या प्रकरणी अनिल मधुकर तीर्थकर (वय ४२, रा. रुईभर, ता. जि. धाराशिव) यांनी शहर पोलिस ठाण्यात फिर्याद दिली आहे. घटना घडल्यानंतर तब्बल वर्षभरानंतर, म्हणजेच २० मार्च २०२६ रोजी ही तक्रार दाखल करण्यात आली. या प्रथम खबरीवरून पोलिसांनी अज्ञात चोरट्यांविरुद्ध भारतीय न्याय संहिता (BNS) कलम ३०३ (२) सह भारतीय वीज/विद्युत अधिनियम कलम १३६ अन्वये गुन्हा नोंदवला आहे. एवढ्या मोठ्या रकमेचा ऐवज चोरीला गेल्यामुळे खळबळ उडाली असून, या प्रकरणाचा पुढील तपास धाराशिव शहर पोलिस करत आहेत.
