परंडा : पोलीस ठाण्याच्या आवारातच शासकीय कामकाज करत असलेल्या पोलिसांसोबत हुज्जत घालून त्यांना शिवीगाळ करत एका पोलिसाच्या बोटाचा चावा घेतल्याची धक्कादायक घटना परंडा येथे घडली आहे. याप्रकरणी देवगाव (ता. परंडा) येथील चौघांवर शासकीय कामात अडथळा आणल्याप्रकरणी आणि मारहाण केल्याप्रकरणी गुन्हा दाखल करण्यात आला आहे. ही घटना २५ मार्च रोजी दुपारी घडली.
अभिमान दिगंबर काळे, फुलाबाई अभिमान काळे, अनिषा अभिमान काळे आणि दिलीप अभिमान काळे (सर्व रा. देवगाव, ता. परंडा, जि. धाराशिव) अशी गुन्हा दाखल झालेल्या आरोपींची नावे आहेत.
याबाबत पोलिसांनी दिलेल्या माहितीनुसार, बुधवारी (दि. २५ मार्च २०२६) दुपारी पावणेतीन वाजण्याच्या सुमारास परंडा पोलीस ठाण्यात फिर्यादी पोलीस कर्मचारी शिवाजी बबन राऊत (वय ३९) आणि इतर पोलीस कर्मचारी त्यांचे शासकीय कामकाज करत होते. यावेळी नमूद केलेले चारही आरोपी पोलीस ठाण्याच्या आवारात आले. त्यांनी तिथे ड्युटीवर असलेल्या पोलिसांसोबत वाद घालण्यास सुरुवात केली.
‘तुझी वर्दी घालवतो’ म्हणत घातला गोंधळ
आरोपींनी पोलिसांना शिवीगाळ करत, “तुझी वर्दी घालवितो,” अशी थेट धमकी दिली. पोलीस ठाण्याच्या आवारातच मोठमोठ्याने आरडाओरडा करून त्यांनी सार्वजनिक शांततेचा भंग केला. यावेळी त्यांना समजून सांगण्याचा प्रयत्न करत असताना आरोपींनी सहाय्यक पोलीस फौजदार (सपोफौ) मुळे यांच्यावर हल्ला केला. त्यांच्या हाताच्या बोटाचा कडाडून चावा घेऊन त्यांना जखमी केले व पोलिसांच्या शासकीय कामकाजात जाणीवपूर्वक अडथळा निर्माण केला.
या गंभीर प्रकारानंतर पोलीस कर्मचारी शिवाजी राऊत यांनी दिलेल्या प्रथम खबरीवरून परंडा पोलीस ठाण्यात चारही आरोपींविरुद्ध भारतीय न्याय संहिता (भा.न्या.सं.) कलम १३२, २९६, २२४, २२१, ११८(१), ३(५) सह महाराष्ट्र पोलीस कायदा (मपोका) कलम ११०, ११२ आणि ११७ अन्वये गुन्हा दाखल करण्यात आला आहे. परंडा पोलीस या प्रकरणाचा पुढील तपास करत आहेत.
