नळदुर्गमध्ये ४८ लाखांचा प्रतिबंधित गुटखा जप्त; कारवाई करणाऱ्या पोलिसांना धमकी, चौघांवर गुन्हा दाखल

नळदुर्ग : नळदुर्ग बायपास रोडवर पोलिसांनी एका आयशर टेम्पोवर मोठी कारवाई करत तब्बल ४८ लाख ४२ हजार ५०० रुपये किमतीचा प्रतिबंधित गोवा गुटखा आणि वाहने जप्त केली आहेत. ही कारवाई करण्यासाठी गेलेल्या पोलिसांना आरोपींनी धमकी देऊन शासकीय कामात अडथळा निर्माण केल्याचा धक्कादायक प्रकार उघडकीस आला आहे. याप्रकरणी नळदुर्ग पोलीस ठाण्यात चौघांविरुद्ध गुन्हा दाखल करण्यात आला आहे.

४८ लाखांचा मुद्देमाल जप्त

पोलिसांनी दिलेल्या माहितीनुसार, २७ मार्च २०२६ रोजी सकाळी ९.१५ वाजताच्या सुमारास नळदुर्ग पोलीस ठाण्यातील पोलीस अंमलदार दत्तात्रय माणिकराव कुंभार (वय ४१) आणि त्यांचा स्टाफ नळदुर्ग बायपास रोडवरील निसर्ग हॉटेलजवळ शासकीय कामकाज करत होते. यावेळी एका आयशर टेम्पोतून (क्र. MH 16 CD 2395) महाराष्ट्र शासनाने प्रतिबंधित केलेल्या आणि मानवी आरोग्यास हानिकारक असलेल्या गोवा गुटख्याची अवैध वाहतूक होत असल्याचे त्यांच्या निदर्शनास आले.

पोलिसांनी टेम्पोची तपासणी केली असता, स्वतःच्या फायद्यासाठी वाहतूक केल्या जात असलेल्या गोवा गुटख्याच्या ५० मोठ्या गोण्या आढळून आल्या. या कारवाईत पोलिसांनी गुटख्यासह आयशर टेम्पो, एक स्विफ्ट कार आणि तीन मोबाईल असा एकूण ४८ लाख ४२ हजार ५०० रुपयांचा मुद्देमाल जप्त केला आहे.

पोलिसांना ‘तुला बघून घेतो’ची धमकी

फिर्यादी दत्तात्रय कुंभार हे जप्त केलेली गाडी पुढील कारवाईसाठी घेऊन जात असताना आरोपींनी त्यांना अडवले. “गाडी सोडून दे, तू कशी काय कारवाई करतो नाहीतर तुला बघतो,” अशी धमकी आरोपींनी दिली. तसेच पोलिसांना शासकीय कर्तव्य पार पाडण्यापासून परावृत्त करण्याचा प्रयत्न करून शासकीय कामात अडथळा निर्माण केला. याशिवाय इतर काही व्यक्तींनीही पोलिसांच्या कारवाईला विरोध करण्यासाठी आरोपींना चिथावणी आणि प्रोत्साहन दिल्याचे फिर्यादीत म्हटले आहे.

या आरोपींवर गुन्हा दाखल

या प्रकरणी दत्तात्रय कुंभार यांनी २८ मार्च २०२६ रोजी दिलेल्या प्रथम खबरीवरून नळदुर्ग पोलीस ठाण्यात खालील आरोपींविरुद्ध गुन्हा नोंदवण्यात आला आहे:

१. संजय सुभाष जगताप (रा. वानेवाडी, ता. पाटोदा, जि. बीड)

२. सचिन परमेश्वर पवार (रा. कुसळंब, ता. पाटोदा, जि. बीड)

३. सतीश तुकाराम सोंडगे (रा. गवळवाडी, ता. पाटोदा, जि. बीड)

४. मिट्टू उर्फ इंद्रजितसिंग रणजितसिंग ठाकूर (रा. नळदुर्ग, ता. तुळजापूर, जि. धाराशिव)

या सर्व आरोपींविरुद्ध भारतीय न्याय संहिता (भा.न्या.सं.) कलम १३२, २२३, २७४, २७५, १२३, ४५, ३(५) सह अन्न सुरक्षा व मानके कायदा कलम ५९ अन्वये गुन्हा दाखल करण्यात आला असून, पोलीस या प्रकरणाचा पुढील तपास करत आहेत.