धाराशिव: शिवसेना (शिंदे गट) पक्षातील अंतर्गत गटबाजी आणि नेत्यांमधील धुसफूस आता थेट सोशल मीडियाच्या माध्यमातून चव्हाट्यावर येऊ लागली आहे. शिंदे सेनेचे माजी जिल्हाप्रमुख सुरज साळुंखे यांनी एका फेसबुक पोस्टद्वारे आपल्याच पक्षातील विद्यमान पदाधिकाऱ्यावर जोरदार टीका केली आहे. “तनाने शिवसेनेत, मनाने भाजपात…” अशा आशयाची अत्यंत खोचक पोस्ट साळुंखे यांनी केल्याने राजकीय वर्तुळात मोठी खळबळ उडाली असून, हा टोला विद्यमान प्रभारी जिल्हाप्रमुखांना लगावला असल्याची जोरदार चर्चा जिल्ह्यात सुरू आहे.
नेमकी पोस्ट काय?
सध्या सोशल मीडियावर सुरज साळुंखे यांची एक फेसबुक पोस्ट वेगाने व्हायरल होत आहे. या पोस्टमध्ये त्यांनी लिहिले आहे की, “तनाने शिवसेनेत मनाने भाजपात कळंबचा दलाल कुबड्या”.
या मोजक्याच पण आक्रमक शब्दांमधून त्यांनी नाव न घेता आपल्या राजकीय विरोधकावर निशाणा साधला आहे. या पोस्टमध्ये वापरण्यात आलेला ‘कळंबचा दलाल’ हा शब्दप्रयोग पाहता, त्यांचा थेट रोख कुणाकडे आहे, याची चर्चा आता राजकीय वर्तुळात रंगू लागली आहे.
वादाची पार्श्वभूमी:
सुरज साळुंखे आणि विद्यमान पदाधिकाऱ्यांमधील या वादाला गेल्या काही महिन्यांची राजकीय पार्श्वभूमी आहे. आगामी जिल्हा परिषद निवडणुकांच्या अनुषंगाने पक्षात मोठे खांदेपालट करण्यात आले होते. त्यावेळी सुरज साळुंखे यांना अचानक जिल्हाप्रमुख पदावरून हटवण्यात आले होते. त्यांच्या जागी कळंबचे अजित पिंगळे यांची प्रभारी जिल्हाप्रमुख म्हणून नियुक्ती करण्यात आली.
साळुंखे यांना पदावरून दूर करून पिंगळे यांच्याकडे जिल्ह्याची धुरा दिल्यापासूनच या दोन्ही नेत्यांमध्ये राजकीय वर्चस्वावरून मोठा वाद (कोल्ड वॉर) सुरू आहे.
शिंदे गटात ‘ऑल इज नॉट वेल’
पदावरून हटवल्याची सल आणि स्थानिक पातळीवरील गटबाजी यातूनच साळुंखे यांनी ही पोस्ट करत आपला संताप व्यक्त केल्याचे बोलले जात आहे. सत्ताधारी पक्षातीलच दोन प्रमुख नेत्यांमधील हा वाद असा चव्हाट्यावर आल्याने सामान्य कार्यकर्त्यांमध्ये संभ्रमाचे वातावरण आहे. या फेसबुक पोस्टमुळे धाराशिव जिल्ह्यातील शिंदे सेनेत सर्वकाही आलबेल नसल्याचे पुन्हा एकदा स्पष्ट झाले असून, आता या उघड वादाची पक्षश्रेष्ठी काय दखल घेतात, याकडे सर्वांचे लक्ष लागले आहे.
