तुळजापूर : श्री तुळजाभवानी देवीच्या दर्शनासाठी आलेल्या एका ६५ वर्षीय वृद्धेच्या गळ्यातील तब्बल १ लाख ६१ हजार रुपये किमतीचे सोन्याचे दागिने अज्ञातांनी चोरून नेल्याची घटना गुरुवारी (ता. २) सकाळी घडली. मंदिर परिसरातील छत्रपती शहाजी महाद्वारासमोर ही घटना घडली असून, गर्दीचा फायदा घेत अज्ञात महिला चोरट्यांनीच ही हातचालाखी केल्याचे उघड झाले आहे. याप्रकरणी तुळजापूर पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, रेखा रमेश काळे (वय ६५, रा. माळी नगर, ता. माळशिरस, जि. सोलापूर) या त्यांच्या सोबतच्या एका साक्षीदार महिलेसह गुरुवारी तुळजापूर येथे देवीच्या दर्शनासाठी आल्या होत्या. सकाळी ११ वाजेच्या सुमारास त्या मंदिर परिसरातील छत्रपती शहाजी महाद्वारासमोरून जात असताना भाविकांची मोठी गर्दी होती. याच गर्दीचा फायदा घेत आजूबाजूला असलेल्या अज्ञात महिलांनी रेखा काळे आणि त्यांच्या सोबतच्या साक्षीदार महिलेच्या गळ्यातील सोन्याचे दागिने मोठ्या शिताफीने चोरून नेले.
काही वेळानंतर गळ्यातील दागिने चोरीला गेल्याचे या दोघींच्या लक्षात आले. त्यांनी घाबरून आजूबाजूला शोधाशोध केली, मात्र चोरट्या महिला तोपर्यंत पसार झाल्या होत्या. चोरीला गेलेल्या सोन्याच्या दागिन्यांची एकूण किंमत १ लाख ६१ हजार रुपये इतकी आहे.
या घटनेनंतर रेखा काळे यांनी तात्काळ तुळजापूर पोलिस ठाण्यात धाव घेऊन तक्रार दिली. त्यांनी दिलेल्या प्रथम खबरीवरून तुळजापूर पोलिसांत अज्ञात महिला चोरट्यांविरुद्ध भारतीय न्याय संहिता (BNS) कलम ३०३ (२) अन्वये गुन्हा नोंदवण्यात आला आहे.
गेल्या काही दिवसांपासून मंदिर परिसरात भाविकांच्या गर्दीचा फायदा घेत महिला चोरट्यांच्या टोळ्या सक्रिय झाल्याचे दिसून येत आहे. या घटनेमुळे भाविकांच्या सुरक्षेचा प्रश्न पुन्हा एकदा ऐरणीवर आला असून, पोलीस आता परिसरातील सीसीटीव्ही कॅमेऱ्यांच्या फुटेजच्या आधारे या महिला चोरट्यांचा कसून शोध घेत आहेत.
