धाराशिव : शहरातील वरुडा रोडवरील संगम हॉटेलसमोर उभा केलेला कच्च्या सुपारीने भरलेला आयशर टेम्पो अज्ञात चोरट्यांनी पळवून नेल्याची मोठी घटना उघडकीस आली आहे. या घटनेत वाहनासह तब्बल ६६ लाख १२ हजार ५९२ रुपये किमतीचा मुद्देमाल चोरीला गेला आहे. भरदिवसा घडलेल्या या धाडसी चोरीमुळे शहरात खळबळ उडाली आहे.
याप्रकरणी अझहर युनूस शेख (वय ३९, रा. ख्वाजा नगर, आझम चौक, गल्ली नं. १९, धाराशिव) यांनी आनंदनगर पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, रविवारी (ता. २९ मार्च) दुपारी २ ते साडेतीन वाजेच्या सुमारास ही घटना घडली. फिर्यादी अझहर शेख यांनी आपला आयशर कंपनीचा टेम्पो (क्रमांक MH 24 AU 1404) वरुडा रोडवरील संगम हॉटेलच्या समोर उभा केला होता. या टेम्पोमध्ये कच्च्या सुपारीच्या तब्बल १५५ बॅगा (वजन १० टन ७५ किलो) भरलेल्या होत्या.
टेम्पो रस्त्याच्या कडेला उभा असल्याची संधी साधून अज्ञात चोरट्यांनी हा संपूर्ण टेम्पोच मालासह पळवून नेला. चोरीला गेलेली कच्ची सुपारी आणि आयशर टेम्पो असा एकूण ६६ लाख १२ हजार ५९२ रुपयांचा ऐवज अज्ञाताने चोरून नेला आहे. आसपास शोधाशोध करूनही वाहन न सापडल्याने अखेर गुरुवारी (ता. २ एप्रिल) अझहर शेख यांनी पोलिसांत धाव घेतली.
शेख यांनी दिलेल्या प्रथम खबरीवरून आनंदनगर पोलिस ठाण्यात अज्ञात चोरट्याविरुद्ध भारतीय न्याय संहिता (BNS) कलम ३०३ (२) अन्वये गुन्हा नोंदवण्यात आला आहे. एवढ्या मोठ्या प्रमाणावर मुद्देमाल चोरीला गेल्याने व्यापारी वर्गात चिंतेचे वातावरण असून, पोलिस परिसरातील सीसीटीव्ही फुटेजच्या आधारे चोरट्यांचा कसून शोध घेत आहेत.
