तामलवाडी : चुलत भावासोबत झालेल्या भांडणाची माहिती वडिलांना का सांगितली, याचा जाब विचारत जमाव जमवून एका २७ वर्षीय तरुणावर कोयता, हातोडा आणि लोखंडी सळईने जीवघेणा हल्ला केल्याची धक्कादायक घटना तुळजापूर तालुक्यातील सुरतगाव येथे घडली आहे. यावेळी आरोपींनी तरुणाच्या हातातील सोन्याची अंगठी हिसकावून घेत त्याच्या मित्रालाही बेदम मारहाण केली. याप्रकरणी तामलवाडी पोलीस ठाण्यात सहा जणांविरुद्ध गंभीर स्वरूपाचा गुन्हा दाखल करण्यात आला आहे.
स्वप्नील ब्रम्हानंद काळे (वय २७ वर्षे, रा. सुरतगाव, ता. तुळजापूर, जि. धाराशिव) असे हल्ल्यात जखमी झालेल्या फिर्यादी तरुणाचे नाव आहे. तर किरण कुबेर मगर, राम कोंडीबा गुंड, महेश बाबू गुंड, गणेश बाळू गुंड, ऋषीकेश महादेव गुंड आणि श्रीकांत गुंड (सर्व रा. सुरतगाव) अशी गुन्हा दाखल झालेल्या सहा आरोपींची नावे आहेत.
नेमके काय घडले?
पोलिसांनी दिलेल्या माहितीनुसार, दि. ३ एप्रिल २०२६ रोजी सकाळी पावणेदहा वाजेच्या सुमारास फिर्यादी स्वप्नील काळे हे सुरतगाव येथील नानासाहेब गुंड यांच्या घरासमोरून जात होते. त्यावेळी सर्व आरोपींनी गैरकायद्याची मंडळी जमवून स्वप्नील याला गाठले. “तू तुझ्या चुलत भावाचे व माझे झालेल्या भांडणाबाबत वडिलांना का सांगितले?” असा जाब आरोपींनी त्याला विचारला.
यावरून वाद घालत आरोपींनी स्वप्नीलला अश्लील शिवीगाळ करण्यास सुरुवात केली. पाहता-पाहता आरोपींनी लाथाबुक्क्यांसह त्यांच्याकडील लोखंडी कोयता, हातोडा, लोखंडी सळई आणि काठीने स्वप्नीलला बेदम मारहाण करून गंभीर जखमी केले. यावेळी आरोपींनी त्याच्या हातातील सोन्याची अंगठीही बळजबरीने काढून घेतली. तसेच, स्वप्नीलच्या मित्रालाही लाथाबुक्क्यांनी मारहाण करून ‘जिवे ठार मारू’ अशी धमकी दिली.
सहा जणांवर गुन्हा दाखल
या भयंकर प्रकारानंतर स्वप्नील काळे याने त्याच दिवशी (३ एप्रिल) तामलवाडी पोलीस ठाण्यात धाव घेत रीतसर तक्रार नोंदवली. त्यांच्या प्रथम खबरेवरून तामलवाडी पोलिसांनी वरील सहाही आरोपींवर भारतीय न्याय संहिता (भा.न्या.सं.) कलम ११८(१), ११९(१), ११५(२), ३५१(२)(३), ३५२, १८९(२), १९१(२), १९१(३) आणि १९० अन्वये बेकायदेशीर जमाव जमवणे, घातक शस्त्रांनी मारहाण करणे, जबरी चोरी आणि जिवे मारण्याची धमकी दिल्याप्रकरणी गुन्हा दाखल केला आहे. या गुन्ह्याचा पुढील तपास तामलवाडी पोलीस करत आहेत.
