भूम : शिवीगाळ केल्याच्या किरकोळ कारणावरून दोन कुटुंबांमध्ये भयंकर हाणामारी झाल्याची घटना भूम शहरातील भीमनगर भागात घडली आहे. या राड्यात दोन्ही गटांकडून चाकू, लोखंडी गज, फरशी आणि दगडांचा सरेआम वापर करण्यात आला असून, यात अनेक जण गंभीर जखमी झाले आहेत. याप्रकरणी भूम पोलीस ठाण्यात दोन्ही गटांनी दिलेल्या फिर्यादीवरून परस्परविरोधी गुन्हे दाखल करण्यात आले आहेत.
पहिली फिर्याद: जिवे मारण्याच्या उद्देशाने प्राणघातक हल्ला
पहिल्या प्रकरणात चंद्रकला कैलास शिंदे (वय ४७, रा. भीमनगर, भूम) यांनी फिर्याद दिली आहे. त्यांच्या तक्रारीनुसार, आरोपी चंद्रकांत शिंदे, सागर शिंदे, सुरेखा शिंदे, रमा शिंदे आणि मनोज शिंदे (सर्व रा. भीमनगर) यांनी दि. ३० मार्च ते १ एप्रिल २०२६ या कालावधीत चंद्रकला आणि त्यांचा मुलगा ऋतुराज यांना जिवे मारण्याच्या उद्देशाने शिवीगाळ केली. तसेच, लाथाबुक्क्यांनी मारहाण करत चाकू, लोखंडी गज, दगड आणि फरशीने प्राणघातक हल्ला करून गंभीर जखमी केले व जिवे मारण्याची धमकी दिली.
या फिर्यादीवरून भूम पोलिसांनी दि. ३ एप्रिल रोजी पाचही आरोपींवर भारतीय न्याय संहिता (भा.न्या.सं.) कलम १०९, ७४, ३५२, ३५१(३), ३५१(४), ३(५) अन्वये गुन्हा दाखल केला आहे.
दुसरी फिर्याद: जमाव जमवून दगडाने मारहाण
याच घटनेत दुसऱ्या गटाकडून चंद्रकांत लिंबाजी शिंदे (वय ५५, रा. भीमनगर, भूम) यांनी क्रॉस फिर्याद दिली आहे. त्यांच्या फिर्यादीनुसार, ‘तुम्ही शिव्या का दिल्या?’ या कारणावरून गैरकायद्याची मंडळी जमवून आरोपी चंद्रकला शिंदे, प्रांजली शिंदे, यशांजली शिंदे, रविना शिंदे, ऋतुराज शिंदे, यश शिंदे, कैलास शिंदे आणि इतर पाच अनोळखी इसमांनी दि. १ एप्रिल रोजी रात्री साडेआठच्या सुमारास त्यांच्यावर हल्ला केला.
यावेळी आरोपींनी चंद्रकांत शिंदे यांच्यासह त्यांची पत्नी, सून आणि मुलाला शिवीगाळ करत लाथाबुक्क्यांनी, तसेच दगड व फरशीने बेदम मारहाण करून जखमी केले आणि जिवे मारण्याची धमकी दिली. याप्रकरणी चंद्रकांत शिंदे यांच्या तक्रारीवरून भूम पोलीस ठाण्यात वरील सर्व आरोपींवर भा.न्या.सं. कलम ११८(१), ११५(२), ३५१(३), ३५२, १८९(२), १९१(२), १९० अन्वये गुन्हा नोंदवण्यात आला आहे.
एकाच परिसरातील दोन कुटुंबांमध्ये हा रक्तरंजित संघर्ष झाल्याने परिसरात तणावाचे आणि दहशतीचे वातावरण आहे. दोन्ही गटांच्या तक्रारींवरून पोलिसांनी गुन्हे दाखल केले असून, या प्रकरणाचा अधिक तपास भूम पोलीस करत आहेत.
