मुरूम- उमरगा तालुक्यातील बेरडवाडी येथे एका व्यक्तीने आपल्या पत्नीची आणि अवघ्या आठ वर्षांच्या चिमुकलीची कुऱ्हाडीने वार करून अत्यंत निर्घृणपणे हत्या केल्याची धक्कादायक घटना उघडकीस आली आहे. या दुहेरी हत्याकांडाने संपूर्ण परिसरात मोठी खळबळ उडाली असून, आरोपी पतीने स्वतः मंगळवारी पहाटे मुरूम पोलीस ठाण्यात हजर होऊन आपल्या गुन्ह्याची कबुली दिली आहे.
लिंबाबाई अजित वासुदेव आणि मानसी (वय ८ वर्षे) अशी या घटनेतील मृत माय-लेकीची नावे आहेत. तर, अजित अणप्पा वासुदेव असे खून करणाऱ्या आरोपी पतीचे नाव आहे.
मिळालेल्या प्राथमिक माहितीनुसार, आरोपी अजित वासुदेव हा मंगळवारी पहाटे २ वाजेच्या सुमारास स्वतःहून मुरूम पोलीस ठाण्यात पोहोचला. तिथे त्याने पोलिसांसमोर आपल्या पत्नीचा आणि मुलीचा कुऱ्हाडीने खून केल्याची धक्कादायक कबुली दिली.
आरोपीने गुन्ह्याची कबुली देताच मुरूम पोलिसांनी तातडीने बेरडवाडी येथील घटनास्थळी धाव घेतली. घटनास्थळी उपविभागीय पोलीस अधिकारी शेलार, मुरूम पोलीस ठाण्याचे अधिकारी संदीप दहिफळे यांच्यासह पोलीस कर्मचाऱ्यांचे पथक दाखल झाले.
-
पोलिसांनी घटनास्थळाचा रीतसर पंचनामा केला.
-
दोन्ही मृतदेह ताब्यात घेऊन मुरूम येथील शासकीय रुग्णालयात शवविच्छेदनासाठी (Post-Mortem) पाठवण्यात आले आहेत.
स्वतःच्याच पत्नी आणि निष्पाप मुलीची इतक्या निर्घृणपणे हत्या करण्यामागचे नेमके कारण अद्याप स्पष्ट झालेले नाही. दरम्यान, या घटनेचे गांभीर्य लक्षात घेऊन दुपारी पोलीस अधीक्षक रितू खोकर यांनी मुरूम पोलीस ठाण्यात धाव घेतली असून, त्यांच्या मार्गदर्शनाखाली पोलिसांकडून या प्रकरणाचा सखोल तपास करण्यात येत आहे.
