धाराशिव: ट्रेडिंगमध्ये मोठी गुंतवणूक केल्यास भरघोस परतावा मिळेल, असे आमिष दाखवून एका सायबर भामट्याने शहरातील एकाची तब्बल ६३ लाख ५० हजार रुपयांची फसवणूक केल्याचा धक्कादायक प्रकार उघडकीस आला आहे. या प्रकरणी धाराशिवच्या सायबर पोलिस ठाण्यात अज्ञाताविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, शहरातील समर्थनगर येथे राहणारे सुशीलकुमार शिवाजीराव सर्डे (वय ४५) यांची या प्रकरणात फसवणूक झाली आहे. २० जानेवारी २०२६ रोजी सर्डे यांना त्यांच्या मोबाईलवर एका अनोळखी क्रमांकावरून एक लिंक आली होती. त्यानंतर सायबर भामट्याने त्यांच्याशी व्हॉट्सॲपवर चॅटिंग सुरू केले.
‘ट्रेडिंगमध्ये पैसे गुंतवल्यास मोठा फायदा होईल आणि जादा परतावा मिळेल,’ असे सांगून या भामट्याने सर्डे यांचा विश्वास संपादन केला. जादा पैशांच्या आमिषाला बळी पडून सर्डे यांनी गुंतवणुकीस होकार दिला. त्यानंतर २० जानेवारी ते ९ मार्च २०२६ या दीड महिन्यांच्या कालावधीत भामट्याने सर्डे यांना विविध कारणे सांगून टप्प्याटप्प्याने तब्बल ६३ लाख ५० हजार रुपये गुंतवण्यास भाग पाडले.
पैसे भरूनही कोणताही परतावा न मिळाल्याने आणि समोरून उडवाउडवीची उत्तरे मिळू लागल्याने आपली फसवणूक झाल्याचे सर्डे यांच्या लक्षात आले. यानंतर त्यांनी थेट सायबर पोलिस ठाणे गाठले.
सुशीलकुमार सर्डे यांनी सोमवारी (ता. ६ एप्रिल) दिलेल्या फिर्यादीवरून, सायबर पोलिस ठाण्यात अज्ञाताविरुद्ध भारतीय न्याय संहितेच्या (BNS) कलम ३१८(४) सह माहिती तंत्रज्ञान सुधारित अधिनियम २००० च्या कलम ६६(सी) आणि ६६(डी) अन्वये गुन्हा दाखल करण्यात आला आहे. या प्रकरणाचा पुढील तपास सायबर पोलिस करत आहेत. नागरिकांनी अनोळखी लिंकवर क्लिक करू नये तसेच अशा भूलथापांना बळी पडू नये, असे आवाहन पोलिसांकडून करण्यात आले आहे.
