धाराशिव जिल्ह्यात चोरीचे सत्र सुरूच; एकाच दिवसात पाच गुन्हे दाखल, पाच लाखांहून अधिक किमतीचा मुद्देमाल लंपास

धाराशिव: जिल्ह्यात चोरीच्या घटनांचे सत्र सुरूच असून, चोरट्यांनी उमरगा, कळंब, शिराढोण, येरमाळा आणि तुळजापूर या पाच वेगवेगळ्या ठिकाणी डल्ला मारल्याचे समोर आले आहे. बियर शॉपी, दुचाकी, लॅपटॉप, शेतातील सोलर प्लेट्स आणि रोहित्रातील (डीपी) ऑईल असा एकूण ५ लाख १९ हजार ५०० रुपयांचा मुद्देमाल चोरट्यांनी लंपास केला आहे. या पाचही घटनांबाबत सोमवारी (ता. ०६ एप्रिल) संबंधित पोलीस ठाण्यांत अज्ञातांविरुद्ध गुन्हे दाखल करण्यात आले आहेत.

• उमरग्यात बियर शॉपी फोडून दोन लाखांची रोकड पळवली

  उमरगा बायपास रोडवरील हॉटेल पंजाबी धामीच्या शेजारी असलेल्या ‘फ्रेन्ड्स बियर शॉपी’च्या छताचा पत्रा कापून चोरट्यांनी आत प्रवेश केला. दुकानातील दोन लाख रुपयांची रोकड आणि ६,५०० रुपयांचे साहित्य असा एकूण २ लाख ६ हजार ५०० रुपयांचा ऐवज चोरून नेला. ही घटना १९ ते २० मार्च दरम्यान घडली. याप्रकरणी कैलास दत्तु कांबळे (वय ३५, रा. मुळज) यांच्या फिर्यादीवरून उमरगा पोलीस ठाण्यात भा.न्या.सं. कलम ३०५(ए), ३३४(१) अन्वये गुन्हा दाखल करण्यात आला आहे.

• कळंब शहरातून दुचाकीची चोरी

  कळंब येथील सुनील मार्केट, नगरपालिका गेटसमोर लावलेली सागर गोरख महाद्वार (वय ३२, रा. इंदिरा नगर, कळंब) यांची ४० हजार रुपये किमतीची होंडा शाईन दुचाकी (MH 25 A.G. 9074) अज्ञात चोरट्याने २ एप्रिल रोजी रात्रीच्या सुमारास पळवली. याप्रकरणी कळंब पोलीस ठाण्यात भा.न्या.सं. कलम ३०३(२) नुसार गुन्हा नोंदवण्यात आला आहे.

• शिराढोण येथे मंगल कार्यालयातून लॅपटॉप लंपास

  शिराढोण येथील ओमसाई मंगल कार्यालयातून अज्ञात व्यक्तीने १५ हजार रुपये किमतीचा डेल (Dell) कंपनीचा लॅपटॉप चोरून नेला. ही घटना २७ मार्च रोजी दुपारी पावणेदोन वाजेच्या सुमारास घडली. याप्रकरणी शिवकुमार प्रल्हाद केंद्रे (वय ३०, रा. दाभा) यांच्या तक्रारीवरून शिराढोण पोलीस ठाण्यात भा.न्या.सं. कलम ३०३(२) अन्वये गुन्हा दाखल झाला आहे.

• तेरखेडा शिवारात २.२ लाखांच्या सोलर प्लेट्सची चोरी

  वाशी तालुक्यातील तेरखेडा शिवारातील गट नं. २५९ मध्ये लावलेल्या सोलर प्लॅन्टच्या स्टॅन्डवरील तब्बल १३ प्लेट्स अज्ञात चोरट्यांनी चोरून नेल्या. ३ ते ४ एप्रिल दरम्यान घडलेल्या या चोरीत २ लाख २० हजार रुपयांचे नुकसान झाले आहे. याप्रकरणी वंदना रविकांत उमरदंड (वय ५३, ह.मु. अंबाजोगाई) यांच्या फिर्यादीवरून येरमाळा पोलीस ठाण्यात भा.न्या.सं. कलम ३०३(२) नुसार गुन्हा दाखल करण्यात आला आहे.

• तुळजापुरात रोहित्राचे (डीपी) ऑईल आणि कॉईल चोरीला

  तुळजापूर तालुक्यातील बारूळ शिवारातील गट नं. ६१७ मधील विहिरीलगत असलेल्या डीपीमधून चोरट्यांनी ८० लिटर ऑईल आणि ॲल्युमिनियमचे कॉईल चोरून नेले. यात शेतकऱ्याचे अंदाजे ३८ हजार रुपयांचे नुकसान झाले आहे. संजय राजाभाऊ व्हटकर (वय २७, रा. गोपाळ नगर, तुळजापूर) यांच्या फिर्यादीवरून तुळजापूर पोलीस ठाण्यात भा.न्या.सं. कलम ३०३(२) अन्वये अज्ञाताविरुद्ध गुन्हा नोंदवण्यात आला आहे.

जिल्ह्यात एकाच वेळी उघडकीस आलेल्या या पाच वेगवेगळ्या चोरीच्या घटनांमुळे नागरिकांमध्ये चिंतेचे वातावरण असून, पोलिसांसमोर या चोऱ्यांचा छडा लावण्याचे मोठे आव्हान उभे राहिले आहे.