धाराशिव : ‘महाराष्ट्र कौन्सिल ऑफ इंडियन मेडिसिन’ची कोणतीही अधिकृत मान्यता नसताना, बेकायदेशीररीत्या दवाखाना थाटून रुग्णांच्या जिवाशी खेळणाऱ्या एका बोगस डॉक्टरवर धाराशिव शहर पोलीस ठाण्यात मंगळवारी (दि. ७) गुन्हा दाखल करण्यात आला आहे. रुग्णांची आणि शासनाची फसवणूक केल्याचा ठपका या कथित डॉक्टरवर ठेवण्यात आला आहे.
डॉ. देवाशिष दास (बंगाली, रा. गणेशनगर, धाराशिव) असे गुन्हा दाखल झालेल्या बोगस डॉक्टरचे नाव आहे.
पोलिसांनी दिलेल्या माहितीनुसार, धाराशिव शहरातील देशपांडे स्टँड परिसरातील नेहरू चौक येथे या डॉक्टरने आपला बोगस दवाखाना सुरू केला होता. दिनांक २९ मार्च २०२६ रोजी दुपारी साडेतीन वाजेच्या सुमारास हा धक्कादायक प्रकार उघडकीस आला. आरोपी डॉ. दास याच्याकडे वैद्यकीय व्यवसाय करण्यासाठी आवश्यक असलेली ‘महाराष्ट्र कौन्सिल ऑफ इंडियन मेडिसिन’ या संस्थेची कोणतीही मान्यता किंवा नोंदणी नव्हती. असे असतानाही तो गैरमार्गाने वैद्यकीय व्यवसाय चालवत होता. यातून त्याने शासन तसेच उपचारासाठी येणाऱ्या निष्पाप रुग्णांची मोठी फसवणूक केली असून, चुकीच्या औषधोपचारांमुळे रुग्णांच्या जिवितास धोका निर्माण केल्याचे समोर आले आहे.
या गंभीर प्रकाराची दखल घेत, धाराशिव उपजिल्हा रुग्णालयाचे शासकीय वैद्यकीय अधिकारी डॉ. उन्मेष संतराम सेलुकर (वय ४६) यांनी स्वतः धाराशिव शहर पोलीस ठाण्यात मंगळवारी (दि. ७) फिर्याद दिली.
डॉ. सेलुकर यांनी दिलेल्या प्रथम खबरीवरून शहर पोलीस ठाण्यात आरोपी डॉ. देवाशिष दास याच्याविरुद्ध भारतीय न्याय संहिता (भा.न्या.सं.) कलम ३१८(४), ३१९(२), २७९, १२५ तसेच महाराष्ट्र वैद्यकीय व्यवसाय अधिनियम कलम ३३, ३३(१), ३३(२)(अ) अन्वये गुन्हा नोंदवण्यात आला आहे. शहराच्या मध्यवर्ती भागात बोगस डॉक्टरचा पर्दाफाश झाल्याने वैद्यकीय वर्तुळात आणि नागरिकांमध्ये मोठी खळबळ उडाली आहे. या प्रकरणाचा अधिक तपास पोलीस करत आहेत.
