येरमाळा : येडेश्वरी देवीच्या पालखीच्या बंदोबस्तावर असलेल्या पोलिसांना धक्काबुक्की करत शासकीय कामात अडथळा निर्माण केल्याचा प्रकार येरमाळा (ता. कळंब) येथील बाजार चौकात घडला. पालखीच्या खांदेकऱ्यालाही यावेळी मारहाण करण्यात आली असून, याप्रकरणी दोन जणांविरुद्ध येरमाळा पोलीस ठाण्यात गुन्हा दाखल करण्यात आला आहे.
पवन जाधव (रा. टेंभुर्णी, जि. सोलापूर) आणि राकेश कसबे (रा. येरमाळा, ता. कळंब, जि. धाराशिव) असे गुन्हा दाखल झालेल्या आरोपींची नावे आहेत.
पोलीस सूत्रांनी दिलेल्या माहितीनुसार, मंगळवारी (दि. ७) संध्याकाळी साडेसहा ते सात वाजेच्या सुमारास येरमाळा येथील बाजार चौकात ही घटना घडली. येडेश्वरी देवीच्या पालखीचा बंदोबस्त करत येरमाळा पोलीस ठाण्याचे सहायक पोलीस निरीक्षक आणि त्यांचा कर्मचारी वर्ग मंदिराकडे पायी जात होता. यावेळी नमुद आरोपींनी अचानक येऊन पोलिसांना धक्काबुक्की करण्यास सुरुवात केली.
आरोपींनी पोलिसांना ढकलून बाजूला केले आणि पालखीचे खांदेकरी वैभव बारकुल यांना मारहाण केली. या हुज्जतबाजीमुळे आणि मारहाणीमुळे पोलिसांच्या शासकीय कामकाजात मोठा अडथळा निर्माण झाला.
याप्रकरणी येरमाळा पोलीस ठाण्याचे सहायक पोलीस निरीक्षक तात्याराव रुपाजी भालेराव यांनी स्वतः फिर्याद दिली आहे. त्यांच्या पहिल्या खबरीवरून येरमाळा पोलीस ठाण्यात पवन जाधव आणि राकेश कसबे यांच्याविरुद्ध भारतीय न्याय संहिता (भा.न्या.सं.) कलम १३२, ११५(२) आणि ३(५) अन्वये गुन्हा नोंदवण्यात आला आहे. या प्रकरणाचा पुढील तपास येरमाळा पोलीस करत आहेत. पालखी सोहळ्यासारख्या गर्दीच्या ठिकाणी पोलिसांशी झालेल्या या हुज्जतबाजीमुळे परिसरात खळबळ उडाली आहे.
