धाराशिव: राज्यात सध्या ‘ऑपरेशन टायगर’ची (ठाकरे गटाचे खासदार शिंदे गटात जाण्याची) जोरदार चर्चा रंगली आहे. या राजकीय उलथापालथीत धाराशिवचे खासदार ओमराजे निंबाळकर यांचेही नाव आघाडीवर होते. मात्र, आज राज्याचे उपमुख्यमंत्री एकनाथ शिंदे यांच्या धाराशिव दौऱ्यात एक मोठा ‘सीन’ पाहायला मिळाला. ओमराजेंनी थेट शिंदेंच्या कार्यक्रमालाच दांडी मारल्याने ‘ऑपरेशन टायगर’ला धाराशिवमध्ये तरी जोरदार ब्रेक लागल्याचे स्पष्ट झाले आहे.
ओमराजेंची ‘गुगली’ आणि चर्चांना पूर्णविराम!
एकनाथ शिंदे आज धाराशिवच्या दौऱ्यावर असून त्यांच्या नियोजित वेळापत्रकानुसार पत्रकार संघाच्या कार्यक्रमात उपमुख्यमंत्री शिंदे आणि खासदार ओमराजे निंबाळकर हे एकाच मंचावर येणार होते. ‘ऑपरेशन टायगर’च्या पार्श्वभूमीवर या दोघांच्या एकत्र येण्याकडे संपूर्ण जिल्ह्याचे नव्हे तर राज्याचे लक्ष लागले होते. मात्र, खा. ओमराजे निंबाळकर यांनी या कार्यक्रमाकडे चक्क पाठ फिरवली. या अनुपस्थितीतून त्यांनी ‘आपण शिंदे गटात जाणार’, या सर्व वावड्यांना एकाच फटक्यात कायमचा ‘पूर्णविराम’ दिला आहे.
“अशा पक्षात कोण जाईल?” – ठाकरे गटाचा सणसणीत चिमटा
एकीकडे ओमराजेंनी शिंदेंची धास्ती खोडून काढली असताना, दुसरीकडे ठाकरे गटाने शिंदे गटाच्या ताज्या फजितीवर (कार्यकर्त्यांच्या धरपकडीवर) मीठ चोळले आहे. दौऱ्यापूर्वीच शिंदे गटाच्या कार्यकर्त्यांना पोलिसांनी नजरकैदेत ठेवल्याच्या घटनेवरून ठाकरे गटाचे जिल्हा प्रवक्ते तानाजी जाधवर यांनी मिश्किल आणि बोचरी टीका केली आहे.
“ज्या पक्षात नेत्यांना स्वतःच्याच कार्यकर्त्यांना पोलीस ठाण्यात डांबून ठेवावे लागते, अशा पक्षात कोण शहाणा जाईल का?” – तानाजी जाधवर, जिल्हा प्रवक्ते, शिवसेना (उद्धव बाळासाहेब ठाकरे)
थोडक्यात सांगायचे तर…
एकनाथ शिंदे यांचा धाराशिव दौरा हा ‘ऑपरेशन टायगर’च्या यशापेक्षा त्यांच्याच पक्षातील अंतर्गत बंडाळी आणि ठाकरे गटाच्या टोलेबाजीमुळे जास्त गाजत आहे. ओमराजेंच्या गैरहजेरीने आणि ठाकरे गटाच्या या शाब्दिक ‘पंच’ने धाराशिवच्या राजकीय आखाड्यात चांगलीच रंगत आणली आहे.
