तामलवाडीतील मिलन लॉजवर छापा; वेश्या व्यवसायाचा पर्दाफाश, दोन बांगलादेशी महिला पोलिसांच्या जाळ्यात

मिळालेल्या माहितीनुसार, तामलवाडी (ता. तुळजापूर, जि. धाराशिव) येथील मिलन लॉजमध्ये काही महिलांकडून वेश्या व्यवसाय करवून घेतला जात असल्याची गुप्त माहिती अनैतिक मानवी वाहतूक शाखेला मिळाली होती. या माहितीच्या आधारे पथकाने नियोजन करून नमूद ठिकाणी अचानक छापा टाकला. त्यावेळी लॉजमध्ये तीन महिला आढळून आल्या. महिला पोलिसांमार्फत त्यांना विश्वासात घेऊन सखोल चौकशी केली असता, हा धक्कादायक प्रकार उघडकीस आला.

महिलांच्या जबाबातून निष्पन्न झाले की, आरोपी दिलीप सिद्धाप्पा मंगरुळे (वय ४३, मूळ रा. अविनाश नगर, एमआयडीसी, सोलापूर) आणि संतोष नामदेव पवार (वय ४०, मूळ रा. तिऱ्हे, ता. उत्तर सोलापूर) हे दोघे त्यांना व्यावसायिक फायद्यासाठी आश्रय देऊन लैंगिक स्वैराचारासाठी प्रवृत्त करत होते. तसेच, या व्यवसायातून मिळणाऱ्या पैशांवर हे आरोपी स्वतःची उपजीविका करत असल्याचेही समोर आले आहे.

पंचवीस हजारांचा मुद्देमाल जप्त

पोलिसांनी तात्काळ दोन्ही आरोपींना ताब्यात घेतले. त्यांच्याकडून दोन मोबाईल फोन, पिग्मीचे छोटे पासबुक, ग्राहकांच्या नोंदीचे रजिस्टर, युपीआय स्कॅनर व मशीन, मिलन लॉजचा परवाना फॉर्म, ५ हजार ७०० रुपयांची रोख रक्कम आणि निरोधची पाकिटे असा एकूण २५ हजार ७०० रुपयांचा मुद्देमाल जप्त करण्यात आला आहे.

सुटका करण्यात आलेल्या महिलांची सुरक्षित स्थळी रवानगी करण्यात आली आहे. याप्रकरणी आरोपी दिलीप मंगरुळे आणि संतोष पवार (सध्या दोघेही रा. मिलन लॉज, तामलवाडी) यांच्याविरुद्ध भारतीय न्याय संहिता (BNS) ६०/२०२६ नुसार कलम १४३, १४४, ३(५) सह अनैतिक मानवी वाहतूक प्रतिबंधक कायदा (PITA) कलम ३, ४, ५ अन्वये तामलवाडी पोलीस ठाण्यात २४ एप्रिल रोजी गुन्हा नोंदवण्यात आला आहे. या कारवाईमुळे परिसरात मोठी खळबळ उडाली आहे.