फेसबुक पिंट्या उर्फ पावशेरसिंहाचा नवा ‘बॉम्ब’! लेदर, टेक्सटाईल गेलं हवेत, आता कौडगावात थेट ‘डिफेन्स मॅन्युफॅक्चरिंग हब’?

राजकारणात ‘फेकाफेकी’चे अनेक जागतिक रेकॉर्ड आहेत, पण आपल्या ‘फेसबुक पिंट्या उर्फ पावशेरसिंह‘ यांचं रेकॉर्ड कोणीच मोडू शकत नाही. साहेबांचं राजकारणाचं गणित एकदम साधं आणि सोपं आहे: दर पाच-दहा वर्षांनी तरुणांना एक नवीन आणि ‘हटके’ स्वप्न विकायचं, रोजगाराची गुंगी द्यायची आणि आपली पोळी भाजून घ्यायची. आता त्यांनी कौडगाव एमआयडीसीत थेट ‘दारूगोळा’ आणि ‘डिफेन्स हब’ फोडायची तयारी केलीय!

स्वप्नांचा महा-सेल: लेदर ते टेक्सटाईलचा प्रवास

गेली १०-१२ वर्षे कौडगाव एमआयडीसीत ‘फेसबुक पिंट्या’ यांनी आश्वासनांचा आणि स्वप्नांचा जणू सेलच लावला होता.

• पहिलं गाजर (लेदर कारखाना): जेव्हा कौडगाव एमआयडीसी नव्यानेच अस्तित्वात येत होती, तेव्हा साहेबांनी जनावरांच्या कातड्यापासून ‘लेदर कारखाना’ काढणार असल्याचं भन्नाट स्वप्न दाखवलं होतं.

• अपग्रेडेड गाजर (टेक्निकल टेक्सटाईल पार्क): लेदरचं भूत उतरल्यावर साहेबांनी आपला ‘प्लॅन’ अपग्रेड केला आणि थेट ‘टेक्निकल टेक्सटाईल पार्क’ची घोषणा ठोकून दिली! १० हजार तरुणांना रोजगार देणार म्हणून एवढी हवा केली की तरुणांनीही उधारीवर कपडे शिवायला टाकले असतील.

आपल्या ‘बोरूबहाद्दर’ यांनी तेव्हाच टाहो फोडून, लेखणी झिजवून जनतेला पटवून दिलं होतं की, “अरे बाबांनो, हा फेसबुक पिंट्या तुम्हाला फक्त फसवतोय! इथे काहीही होणार नाही, हे सगळं हवेतच विरणार आहे.” पण तेव्हा अनेकांना ते पटलं नाही. अखेर काळानं बोरूबहाद्दरांचे शब्द १००% खरे ठरवले. १० हजार रोजगार तर सोडाच, तिथे १० मजुरांनाही काम मिळालं नाही.

आता नवा ‘बॉम्ब’: दारूगोळा कारखाना आणि ‘डिफेन्स मॅन्युफॅक्चरिंग हब’!

जुन्या घोषणांचा फुगा फुटल्यावर आणि जुनी आश्वासने ‘एक्स्पायर’ झाल्यावर फेसबुक पिंट्या उर्फ पावशेरसिंहांनी आता खिशातून नवा आणि जास्त आवाजाचा ‘बॉम्ब’ काढलाय. नुसता दारूगोळा कारखाना नाही, तर आता साहेब कौडगाव एमआयडीसीत थेट ‘डिफेन्स मॅन्युफॅक्चरिंग हब’ (संरक्षण साहित्य निर्मिती केंद्र) आणण्यासाठी प्रयत्न करणार असल्याची ‘ब्रह्मास्त्र’ लेव्हलची घोषणा त्यांनी ठोकून दिली आहे!

म्हणजे बघा हाहा! कालपर्यंत ज्यांना साधे कपडे शिवण्याचा कारखाना आणता आला नाही, ते आता थेट रणगाडे, क्षेपणास्त्रे आणि दारूगोळा बनवणार!

• २,००० इंजिनिअर्सना थेट नोकरी!

• १,००० इतर लोकांना रोजगार!

पण हे डिफेन्स हब नक्की कसं येणार? कोणती कंपनी हे दारूगोळ्याचं साहित्य बनवणार? कच्चा माल कुठून येणार? हे सगळे कळीचे मुद्दे फेसबुक पिंट्याने नेहमीप्रमाणे अतिशय शिताफीने ‘गुलदस्त्यात’ ठेवले आहेत. कारण साहेबांनाही माहितीये, ‘हवेतल्या’ कारखान्यांना ना मालक असतो ना पत्ता!

खरा खेळ ‘जमिनीचा’: स्वतःच्या प्रॉपर्टीचं ‘डिफेन्स’ आणि पुण्याच्या उद्योगपतीची एन्ट्री!

दारूगोळा, डिफेन्स हब आणि इंजिनिअर्स हा तर फक्त देखावा आहे; खरा डोळा आहे तो कौडगाव एमआयडीसीतल्या १,५०० एकर मोक्याच्या जमिनीवर! लोकांना वाटतंय हे देशाच्या संरक्षणासाठी ‘डिफेन्स हब’ आहे, पण प्रत्यक्षात हे फेसबुक पिंट्याच्या स्वतःच्या ‘जमिनींच्या संरक्षणासाठी’ (Defence) उभारलेलं हब आहे!

साहेबांची भूक एवढ्यावरच भागलेली नाही, तर आजूबाजूची आणखी ४,००० एकर जमीन ‘अधिग्रहित’ करण्याचा त्यांचा महा-प्लॅन आहे. या ‘जमीन-हडप’ मोहिमेत साहेबांना भक्कम साथ मिळालीये ती पुण्याच्या एका बड्या उद्योगपतीची! या उद्योगपतीशी संधान साधून इथल्या शेतकऱ्यांच्या हजारो एकर जमिनींवर डल्ला मारण्याचे हे खतरनाक मनसुबे रचले जात आहेत. कारखान्याचं गाजर दाखवून जमिनी कवडीमोल भावाने लाटायच्या आणि स्वतःची ‘प्रॉपर्टी’ वाढवायची, हाच या डिफेन्स हबमागचा खरा ‘स्फोट’ आहे.

तात्पर्य: तरुणांनो आणि शेतकरी बांधवांनो, काल तुम्ही लेदर कारखान्याची वाट पाहिली, आज टेक्सटाईल पार्कची राख झाली, आता उद्या ‘दारूगोळा आणि डिफेन्स हब’च्या नावाने तुमच्या हाती फक्त ‘धूर’च लागणार आहे. फेसबुक पिंट्याची ही नवीन पोस्ट लाईक करा, पण आपल्या जमिनी वाचवायच्या असतील तर बोरूबहाद्दरांनी दिलेला इशारा वेळीच ओळखा!