धाराशिव : जिल्ह्यात अल्पवयीन मुलींवरील अत्याचाराच्या घटनांमध्ये चिंताजनक वाढ होत असल्याचे चित्र असून, येरमाळा आणि मुरुम पोलीस ठाण्याच्या हद्दीत दोन वेगवेगळ्या धक्कादायक घटना उघडकीस आल्या आहेत. एका घटनेत १४ वर्षीय मुलीला निर्जनस्थळी नेऊन लैंगिक अत्याचार करण्यात आला, तर दुसऱ्या घटनेत चक्क अल्पवयीन मुलीचा बेकायदेशीरपणे विवाह लावून देत तिच्यावर अत्याचार करण्यात आल्याचा संतापजनक प्रकार समोर आला आहे. या दोन्ही प्रकरणांत पोक्सो (POCSO) कायद्यांतर्गत गुन्हे दाखल करण्यात आले आहेत.
येरमाळा: एकटेपणाचा फायदा घेत डोंगराजवळ अत्याचार
पहिली घटना येरमाळा पोलीस ठाण्याच्या हद्दीतील एका गावात घडली. दि. ७ एप्रिल २०२६ रोजी सायंकाळी ५ वाजेच्या सुमारास १४ वर्षे ५ महिने वयाची पीडित मुलगी एकटी असल्याचा फायदा एका तरुणाने घेतला. तिला गावातील रस्त्यावरून जाणाऱ्या एका पायवाटेने डोंगराजवळ नेले व तेथे तिच्यावर लैंगिक अत्याचार केला. याप्रकरणी पीडितेच्या आईने बुधवारी (दि. ६ मे) दिलेल्या प्रथम खबरेवरून येरमाळा पोलीस ठाण्यात तरुणाविरुद्ध भारतीय न्याय संहिता (BNS) कलम ६४(१), (२) (फ) (जे) सह पोक्सो कायदा कलम ४ व ८ अन्वये गुन्हा दाखल करण्यात आला आहे.
मुरुम: अल्पवयीन मुलीचा बालविवाह लावून अत्याचार
दुसरी घटना मुरुम पोलीस ठाण्याच्या हद्दीत घडली असून, यात १७ वर्षे १० महिने वयाच्या अल्पवयीन मुलीचा बालविवाह लावून देण्यात आला. दि. २२ मे २०२५ ते १ मे २०२६ या वर्षभराच्या कालावधीत ५ आरोपींनी संगनमत करून या अल्पवयीन मुलीचे लग्न लावून दिले. त्यानंतर एका तरुणाने तिच्यावर वारंवार लैंगिक अत्याचार केला. या जाचाला कंटाळून अखेर स्वतः पीडित मुलीने बुधवारी (दि. ६ मे) मुरुम पोलीस ठाण्यात धाव घेत फिर्याद दिली. या तक्रारीवरून ५ आरोपींविरुद्ध बीएनएस कलम ६४(२)(एम), ३(५) सह पोक्सो कायदा कलम ४ आणि बालविवाह प्रतिबंधक कायदा कलम ९ व ११ अन्वये गुन्हा नोंदवण्यात आला आहे.
(टीप: सर्वोच्च न्यायालय आणि कायद्याच्या निर्देशांनुसार दोन्ही प्रकरणांतील पीडित मुली आणि त्यांच्या गावांची नावे गोपनीय ठेवण्यात आली आहेत.)
