कळंब: अनुसूचित जातीच्या महिलेचा विनयभंग करून तिला जातीवाचक शिवीगाळ करत जीवे मारण्याची धमकी देणाऱ्या दोन आरोपींना कळंब जिल्हा व सत्र न्यायालयाने ६ वर्षांची शिक्षा आणि प्रत्येकी एक हजार रुपये दंडाची शिक्षा सुनावली आहे. कळंब जिल्हा व सत्र न्यायालयाचे न्यायाधीश आर. के. राजेभोसले यांनी दिनांक ०८ मे २०२६ रोजी हा निकाल दिला. भैरवनाथ गुणवंत दिवाणे आणि प्रदीप बिभीषण दिवाणे अशी शिक्षा झालेल्या आरोपींची नावे आहेत.
कळंब तालुक्यातील येरमाळा येथे ७ फेब्रुवारी २०२४ रोजी ही घटना घडली होती. फिर्यादी महिला ही मातंग समाजाची तर आरोपी हे मराठा समाजाचे आहेत, याची माहिती आरोपींना होती. पीडित महिला स्वयंपाक करत असताना आरोपी क्रमांक १ भैरवनाथ दिवाणे आणि आरोपी क्रमांक २ प्रदीप दिवाणे यांनी तिथे जाऊन महिलेच्या अंगावरील गाऊनला वाईट उद्देशाने हात लावून झोंबाझोंबी केली. तसेच आरोपी क्रमांक १ याने महिलेचा डावा हात वाईट हेतूने धरून विनयभंग केला.
यानंतर आरोपी क्रमांक २ याने महिलेला जातीवाचक शिवीगाळ केली. पीडित महिलेने आरोपींच्या तावडीतून सुटण्यासाठी आरडाओरड केली असता, आरोपींनी तिला ‘आमच्या दोघांसोबत नाही आली तर तुला, तुझ्या पतीला आणि मुलाला जिवंत ठेवणार नाही’ अशी जीवे मारण्याची धमकी दिली.
या गंभीर प्रकारानंतर येरमाळा पोलीस ठाण्यात आरोपींविरुद्ध गुन्हा दाखल करण्यात आला होता. या गुन्ह्याचा तपास कळंबचे उपविभागीय पोलीस अधिकारी संजय पवार यांनी करून कळंबच्या जिल्हा व सत्र न्यायालयात दोषारोपपत्र दाखल केले.
सुनावणीदरम्यान सरकार पक्षातर्फे एकूण ६ साक्षीदार तपासण्यात आले. यामध्ये पीडितेची साक्ष आणि इतर साक्षीदारांचे पुरावे अतिशय महत्त्वपूर्ण ठरले. पुराव्यांच्या आधारे न्यायाधीश आर. के. राजेभोसले यांनी आरोपी भैरवनाथ दिवाणे आणि प्रदीप दिवाणे यांना विविध कलम ३५४ आणि ॲट्रॉसिटी कायद्यांतर्गत दोषी ठरवले. त्यांना ६ वर्षांची शिक्षा व प्रत्येकी १००० रुपये दंड सुनावण्यात आला आहे. या खटल्यात सरकार पक्षातर्फे अतिरिक्त जिल्हा सरकारी वकील ॲड. आशिष कुलकर्णी यांनी भक्कम बाजू मांडली.
