लोहारा : तुमच्या भावाने आमच्याविरुद्ध पोलीस ठाण्यात तक्रार का दिली, या कारणावरून झालेल्या वादातून तिघांनी मिळून एका तरुणावर ब्लेड आणि लोखंडी नळीने जीवघेणा हल्ला केल्याची घटना होळी (ता. लोहारा) येथे घडली. या हल्ल्यात पुण्याहून गावी आलेला तरुण गंभीर जखमी झाला असून, लोहारा पोलिसांनी तिघांविरुद्ध गुन्हा दाखल केला आहे.
याबाबत पोलिसांनी दिलेली माहिती अशी की, महादेव शिवाजी कांबळे (वय ३९, मूळ रा. होळी, सध्या रा. खराडी, पुणे) हे गावी आले असताना शुक्रवारी (ता. ८) सकाळी पावणेबाराच्या सुमारास अण्णाभाऊ साठे चौक परिसरात ही घटना घडली.
फिर्यादी महादेव कांबळे यांच्या भावाने आरोपींविरुद्ध यापूर्वी पोलिसांत तक्रार दिली होती. याचाच राग मनात धरून आरोपी मनोज राम पाटोळे, अभिजीत राम पाटोळे (दोघे रा. होळी) आणि अमर कांबळे (रा. कोल्हापूर) यांनी फिर्यादीला गाठले. “तुझ्या भावाने आमच्या विरोधात तक्रार का दिली?” असे म्हणत त्यांनी अश्लील शिवीगाळ करण्यास सुरुवात केली.
वादाचे रूपांतर हाणामारीत झाल्यानंतर आरोपींनी महादेव यांना लाथाबुक्क्यांनी मारहाण केली. याचवेळी एका आरोपीने ब्लेडने वार केले, तर दुसऱ्याने लोखंडी नळीने डोक्यात व शरीरावर प्रहार करून गंभीर जखमी केले. परिसरात गोंधळ निर्माण झाल्यानंतर आरोपींनी “तुला जिवे ठार मारू” अशी धमकी देऊन तेथून पळ काढला.
या प्रकरणी जखमी महादेव कांबळे यांनी दिलेल्या फिर्यादीवरून लोहारा पोलीस ठाण्यात मनोज पाटोळे, अभिजीत पाटोळे आणि अमर कांबळे यांच्या विरोधात भारतीय न्याय संहिता (BNS) कलम ११८(२), ३५२, ३५१(२)(३), ३(५) अन्वये गुन्हा नोंदवण्यात आला आहे. या घटनेचा पुढील तपास पोलीस करत आहेत.
