येरमाळा : खोटे नाव सांगून आणि स्वतःची खरी ओळख लपवून एका २८ वर्षीय तरुणीसोबत जवळीक वाढवून तिच्यावर वारंवार लैंगिक अत्याचार केल्याचा धक्कादायक प्रकार उघडकीस आला आहे. आरोपीने तरुणीचे छायाचित्र व्हायरल करण्याची धमकी देत तिच्यावर लग्नासाठी दबाव टाकला आणि मारहाणही केली. याप्रकरणी पीडितेच्या तक्रारीवरून येरमाळा पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, येरमाळा पोलीस ठाण्याच्या हद्दीतील एका गावात राहणाऱ्या २८ वर्षीय तरुणीसोबत (नाव व गाव गोपनीय) एका तरुणाने ओळख वाढवली होती. मात्र, त्याने स्वतःची खरी ओळख लपवून तिला खोटे नाव सांगितले होते. १ जानेवारी २०२३ ते ३ मे २०२६ या तीन वर्षांहून अधिक काळ त्याने तरुणीच्या घरी जाऊन तिच्यावर वारंवार लैंगिक अत्याचार केले.
याशिवाय, आरोपीने तिचे छायाचित्रीकरण करून ते व्हायरल करण्याची धमकी दिली. याच ब्लॅकमेलिंगच्या जोरावर त्याने पीडितेवर लग्नासाठी दबाव आणला आणि बळजबरीने तिच्याशी लग्न केले. लग्नानंतरही आरोपीचा त्रास थांबला नाही. त्याने पीडितेला वेळोवेळी शिवीगाळ करत बेदम मारहाण केली.
या सततच्या शारीरिक आणि मानसिक त्रासाला कंटाळून अखेर पीडितेने ९ मे २०२६ रोजी येरमाळा पोलीस ठाण्यात धाव घेत घडलेला सर्व प्रकार पोलिसांना सांगितला. पीडितेने दिलेल्या प्रथम खबरेवरून पोलिसांनी आरोपीविरुद्ध भारतीय न्याय संहिता (BNS) कलम ६४, ६४(२)(एन), ३१८(२), १२७(४), २९९, ११८(१), ११५(२), ३५१(२) आणि ३५२ अन्वये गुन्हा दाखल केला आहे. या प्रकरणाचा पुढील तपास येरमाळा पोलीस करत आहेत.
