येरमाळा : येथील प्रसिद्ध येडेश्वरी देवीच्या मंदिरात दर्शनासाठी आलेल्या एका भाविक महिलेच्या गळ्यातील सुमारे ९५ हजार रुपये किमतीचे १० ग्रॅम वजनाचे सोन्याचे मिनी गंठण अज्ञात चोरट्याने गर्दीचा फायदा घेत चोरून नेल्याची घटना उघडकीस आली आहे. याप्रकरणी रविवारी (ता. १०) येरमाळा पोलीस ठाण्यात अज्ञाताविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सोलापूर जिल्ह्यातील बार्शी तालुक्यातील उपळाई ठोंगे येथील अंकुश परशुराम गवळी (वय ५५) हे आपल्या कुटुंबीयांसह येरमाळा येथे येडेश्वरी देवीच्या दर्शनासाठी आले होते. शुक्रवारी (ता. ०८) दुपारी दोन ते तीन वाजेच्या सुमारास ते मंदिरात देवदर्शन करत होते. यावेळी मंदिरात भाविकांची मोठी गर्दी होती. याच गर्दीचा फायदा घेत एका अज्ञात चोरट्याने अंकुश गवळी यांची सून ऋतुजा गवळी यांच्या गळ्यातील १० ग्रॅम वजनाचे सोन्याचे मिनी गंठण अतिशय हातचलाखीने चोरून नेले. चोरीला गेलेल्या या सोन्याच्या दागिन्याची अंदाजे किंमत ९५ हजार रुपये इतकी आहे.
दर्शन झाल्यानंतर गळ्यातील गंठण चोरीला गेल्याचे ऋतुजा यांच्या लक्षात आले. त्यानंतर त्यांनी व त्यांच्या कुटुंबीयांनी मंदिर परिसरात शोधाशोध केली, मात्र दागिन्यांचा कुठेही शोध लागला नाही. अखेर याप्रकरणी अंकुश गवळी यांनी रविवारी (ता. १०) येरमाळा पोलीस ठाण्यात धाव घेऊन तक्रार दिली.
त्यांच्या प्रथम खबरीवरून येरमाळा पोलीस ठाण्यात अज्ञात चोरट्याविरुद्ध भारतीय न्याय संहितेच्या (BNS) कलम ३०३(२) अन्वये गुन्हा नोंदवण्यात आला आहे. या गुन्ह्याचा पुढील तपास येरमाळा पोलीस करत आहेत. दरम्यान, या घटनेमुळे मंदिरात दर्शनासाठी येणाऱ्या महिला भाविकांमध्ये चिंतेचे वातावरण असून, गर्दीच्या ठिकाणी महिलांनी आपल्या मौल्यवान दागिन्यांची काळजी घ्यावी, असे आवाहन पोलिसांकडून करण्यात आले आहे.
