धाराशिव: जिल्ह्यात चोरीच्या घटनांमध्ये मोठी वाढ झाली असून, भुरट्या चोरांचा सुळसुळाट पाहायला मिळत आहे. मंगळवारी (ता. १२) एकाच दिवशी धाराशिव ग्रामीण, वाशी, भूम आणि आनंदनगर अशा चार वेगवेगळ्या पोलिस ठाण्यांमध्ये चोरीचे गुन्हे दाखल झाले आहेत. यात एसटी बसमधील महिला प्रवाशाचे दोन लाखांचे दागिने, सौर ऊर्जा प्रकल्पातील तांब्याच्या तारा, दुचाकी आणि मोबाईल असा एकूण तीन लाख दहा हजार रुपयांचा मुद्देमाल चोरीला गेला आहे. या सर्व प्रकरणी भारतीय न्याय संहिता (BNS) कलम ३०३ (२) अन्वये गुन्हे दाखल करण्यात आले आहेत.
पोलिसांनी दिलेल्या माहितीनुसार या घटनांचा सविस्तर तपशील खालीलप्रमाणे:
बसमधून २ लाख १० हजारांचे सोन्याचे दागिने लंपास
जालना ते सोलापूर या बसने प्रवास करणाऱ्या एका महिलेचे २ लाख १० हजार रुपये किमतीचे ३५ ग्रॅम सोन्याचे दागिने अज्ञात चोरट्याने पळवून नेले. ही घटना सोमवारी (ता. ११) सकाळी ११.१५ ते ११.३० च्या सुमारास कुंथलगिरी फाटा येथे घडली. सदर बस जेवणासाठी थांबली असता, फिर्यादी स्वाती विकास गवळी (वय ३८, रा. राम मंदिर शेजारी, मोहळ) या त्यांच्या आई व बहिणीसोबत वॉशरूमसाठी खाली उतरल्या होत्या. याच संधीचा फायदा घेत अज्ञाताने त्यांच्या बॅगमधील सोन्याचे दागिने लांबवले. याप्रकरणी मंगळवारी (ता. १२) वाशी पोलिस ठाण्यात गुन्हा नोंदवण्यात आला आहे.
सौर प्रकल्पातील ७० हजारांच्या तांब्याच्या तारा चोरीला
कोंडगाव (ता. धाराशिव) येथील महाजेनको व भेज कंपनी प्रा. लि. च्या सौर ऊर्जा प्रकल्पातून तब्बल ७० हजार रुपये किमतीची ३४ किलोमीटर लांबीची (४ स्क्वेअर मिमी) तांब्याची तार चोरीला गेली आहे. १४ ते १५ एप्रिल आणि २५ ते २६ एप्रिल या कालावधीत अज्ञात व्यक्तीने ‘आर आर १०’ या लोकेशनवरील ६ एसएमबी व ११ एसएमबी सौर पॅनेलला जोडलेली ही तार कापून नेली. या प्रकरणी सागर मोहन येलगुंटवार (वय ३७, रा. मोढा, ता. हिंगणा, जि. नागपूर) यांनी दिलेल्या फिर्यादीवरून धाराशिव ग्रामीण पोलिस ठाण्यात गुन्हा दाखल करण्यात आला आहे.
पाथरुड येथून घरासमोरील दुचाकीची चोरी
पाथरुड (ता. भूम) येथील अंबी रोड परिसरातून घरासमोर उभी केलेली १५ हजार रुपये किमतीची हिरो होंडा एचएफ डिलक्स दुचाकी (क्र. एमएच २५ एएन ३३०३) चोरीला गेली आहे. सोमवारी (ता. ११) पहाटे ४ ते सकाळी ६ वाजेच्या सुमारास अज्ञात चोरट्याने ही दुचाकी पळवून नेली. याप्रकरणी शिवाजी उलन पवार (वय २४, रा. पाथरुड) यांनी दिलेल्या प्रथम खबरेवरून भूम पोलिस ठाण्यात अज्ञात व्यक्तीविरुद्ध चोरीचा गुन्हा दाखल करण्यात आला आहे.
फोन करण्याच्या बहाण्याने मोबाईल घेऊन पोबारा
‘माझ्या बहिणीला फोन करून पैसे मागवायचे आहेत’, असे खोटे सांगून एकाने १५ हजार रुपये किमतीचा ‘विवो’ कंपनीचा मोबाईल घेऊन पोबारा केल्याची घटना २८ एप्रिल रोजी सकाळी साडेदहाच्या सुमारास घडली. याप्रकरणी काकासाहेब नारायण साळुंके (वय ४४, रा. राजुरी, ता. धाराशिव) यांनी मंगळवारी (ता. १२) आनंदनगर पोलिस ठाण्यात फिर्याद दिली. यावरून आरोपी नवनाथ शिंदे (रा. भवानी चौक, सांजा, ता. धाराशिव) याच्यावर गुन्हा नोंदवण्यात आला असून पोलिस अधिक तपास करत आहेत.
