नळदुर्ग: महाराष्ट्र शासनाने प्रतिबंधित केलेला गुटखा व सुगंधित तंबाखूची बेकायदेशीरपणे विक्री करण्यासाठी साठा केल्याप्रकरणी नळदुर्ग पोलिसांनी येवती (ता. तुळजापूर) येथे एका किराणा दुकानावर छापा टाकला. या कारवाईत पोलिसांनी तब्बल ५४ हजार ६११ रुपये किमतीचा अवैध गुटखा जप्त केला असून, दुकानदारावर नळदुर्ग पोलिस ठाण्यात गुन्हा दाखल करण्यात आला आहे.
नळदुर्ग पोलिसांनी दिलेल्या माहितीनुसार, विशाल वसंत शिंदे (वय ४१, रा. येवती, ता. तुळजापूर, जि. धाराशिव) असे गुन्हा दाखल झालेल्या आरोपीचे नाव आहे. येवती गावातील ‘विशाल कम्युनिकेशन किराणा स्टोअर्स’ नावाच्या दुकानात शासनाने बंदी घातलेला गुटखा विक्रीसाठी ठेवला असल्याची माहिती नळदुर्ग पोलिसांना मिळाली होती.
या माहितीच्या आधारे पोलिसांच्या पथकाने सोमवारी (ता. ११) रात्री साडेदहा वाजेच्या सुमारास सदर दुकानावर अचानक छापा टाकला. यावेळी दुकानात शासनाने प्रतिबंधित केलेला विमल पान मसाला, डायरेक्टर पान मसाला आणि सुगंधित तंबाखू असा एकूण ५४ हजार ६११ रुपये किमतीचा माल विक्रीसाठी जवळ बाळगल्याचे पोलिसांच्या निदर्शनास आले.
पोलिसांनी घटनास्थळावरून हा सर्व गुटखा आणि पान मसाल्याचा साठा जप्त केला आहे. याप्रकरणी आरोपी विशाल शिंदे याच्याविरुद्ध नळदुर्ग पोलिस ठाण्यात भारतीय न्याय संहिता (BNS) कलम २२३, २७४, २७५ तसेच अन्नसुरक्षा व मानके कायदा कलम ५९ अन्वये गुन्हा नोंदवण्यात आला आहे. या धडक कारवाईमुळे परिसरातील अवैध गुटखा विक्रेत्यांचे धाबे दणाणले आहेत.
