अणदूर : अणदूर येथील नीलकंठेश्वर मठाचे मठाधिपती श्री. ष. ब्र. शिवयोगी शिवाचार्य महास्वामीजी यांच्या पट्टाभिषेक रौप्य महोत्सवानिमित्त आयोजित ‘त्रिवेणी महोत्सवाचे’ मंगळवारी अत्यंत मंगलमय व उत्साही वातावरणात उद्घाटन झाले. राज्याचे माजी मंत्री मधुकरराव चव्हाण यांच्या हस्ते दीपप्रज्वलन करून या सोहळ्याची सुरुवात करण्यात आली. यावेळी राजकीय, सामाजिक आणि अध्यात्मिक क्षेत्रातील अनेक मान्यवर उपस्थित होते.
कार्यक्रमाची सुरुवात ध्वजपूजन तसेच जगद्गुरू रेणुकाचार्य, महात्मा बसवेश्वर आणि लिंगैक्य प्रभुलींग महास्वामीजी यांच्या प्रतिमा पूजनाने झाली. यावेळी संपूर्ण मठ परिसर ‘हर हर महादेव’ आणि ‘ॐ नमः शिवाय’च्या जयघोषाने दुमदुमून गेला होता. महोत्सवाच्या निमित्ताने अणदूर नगरीत भक्तीचा महापूर आल्याचे चित्र पाहायला मिळाले.
मठाचे कार्य केवळ धार्मिक नाही, तर दिशादर्शक: मधुकरराव चव्हाण
यावेळी बोलताना माजी मंत्री मधुकरराव चव्हाण म्हणाले की, नीलकंठेश्वर मठाने केवळ धार्मिक कार्यच केले नाही, तर समाजाला दिशा देण्याचे महत्त्वाचे काम केले आहे. शिवयोगी शिवाचार्य महास्वामीजींच्या २५ वर्षांच्या कार्यकाळात मठाने शैक्षणिक आणि सामाजिक क्षेत्रात मोठे योगदान दिल्याचे त्यांनी अधोरेखित केले. तसेच, आमदार प्रवीण स्वामी यांनीही मठाच्या कार्याचा गौरव केला.
हरिहरानंद भारती यांच्या वाणीतून ‘शिवतत्त्वाचा’ उलगडा
या महोत्सवाचे मुख्य आकर्षण असलेली ‘शिवकथा’ ऐकण्यासाठी पंचक्रोशीतील भाविकांनी मोठी गर्दी केली आहे. प. हरिहरानंद भारती स्वामी यांनी आपल्या ओघवत्या शैलीत ‘शिवतत्त्वाचा’ उलगडा केला. “माणसाने स्वतःमधील अहंकाराचा त्याग करून सेवाभावाने वागावे, हेच खऱ्या शिवभक्तीचे स्वरूप आहे,” असा संदेश त्यांनी दिला. सलग सात दिवस चालणाऱ्या या संगीतमय भजनांची जोड असलेल्या शिवकथेमुळे दररोज सायंकाळी अणदूरमध्ये आध्यात्मिक ऊर्जेचा संचार होत आहे.
अध्यात्मासोबतच सामाजिक बांधिलकीचा जागर
दक्षिण महाराष्ट्रातील एक महत्त्वाचे श्रद्धास्थान असलेल्या नीलकंठेश्वर मठाच्या माध्यमातून गेल्या अडीच दशकात लोककल्याणाचे अनेक प्रकल्प राबवले गेले आहेत. हा रौप्य महोत्सव केवळ एका कालखंडाचा उत्सव नसून, युवा पिढीला संस्कृतीची जोड देण्याचा प्रयत्न आहे. आगामी काळात या महोत्सवांतर्गत रक्तदान शिबिर, आरोग्य तपासणी आणि विविध मेळाव्यांचे आयोजन करण्यात येणार असून, यातून सामाजिक बांधिलकी जपली जाणार आहे.
या भव्य सोहळ्याला हिरेनागाव, नांदगाव, उदगीर, राजेश्वर, जेवळी व सास्तूर येथील महास्वामीजींची प्रमुख उपस्थिती होती. तसेच जि. प. सदस्य जितेंद्र कानडे, दीपक आलुरे, कल्याणी मुळे, संतोष मुळे, श्रीशैल लंगडे, बाबुराव मुळे यांच्यासह भाविक मोठ्या संख्येने उपस्थित होते. कार्यक्रमाचे प्रास्ताविक सरपंच रामचंद्र आलुरे यांनी केले, उद्घाटनानंतर प. हरिहरानंद भारती स्वामी यांच्या रसाळ वाणीतून शिवकथेचे निरूपण झाले.
