तुळजापूर : श्री तुळजाभवानी मंदिर संस्थानने प्रवेश बंदी केलेली असतानाही, बंदी आदेशाचे उल्लंघन करून मंदिराच्या दर्शन मंडपातील गेटचे कुलूप तोडून नुकसान केल्याचा धक्कादायक प्रकार उघडकीस आला आहे. या प्रकरणी रविवारी (ता. १७) तुळजापूर पोलिस ठाण्यात दोघा संशयितांवर गुन्हा दाखल करण्यात आला आहे.
अभिषेक अशोकराव साळुंके आणि हर्ष सोंजी (दोघे रा. तुळजापूर, जि. धाराशिव) अशी गुन्हा दाखल झालेल्या आरोपींची नावे आहेत. या प्रकरणी ऋषीकेश बाबासाहेब पराडे (वय ३३, रा. विवेकानंदनगर, तुळजापूर) यांनी पोलिसांत फिर्याद दिली आहे.
पोलिसांनी दिलेल्या माहितीनुसार, श्री तुळजाभवानी मंदिर देवस्थानने अभिषेक साळुंके आणि हर्ष सोंजी या दोघांना मंदिरात प्रवेश करण्यास बंदी घातलेली आहे. असे असतानाही १० मे रोजी सकाळी ११.३९ ते १२.३६ वाजेच्या सुमारास या दोघांनी दर्शन मंडपाच्या चौथ्या मजल्यावरील देरेस गेट येथे जाऊन प्रवेश बंदी आदेशाचे उल्लंघन केले. तसेच, बळजबरीने मंदिराच्या गेटचे लॉक तोडून देवस्थानच्या मालमत्तेचे नुकसान केले.
हा प्रकार निदर्शनास आल्यानंतर, रविवारी (ता. १७) ऋषीकेश पराडे यांनी दिलेल्या प्रथम खबरीवरून तुळजापूर पोलिस ठाण्यात भारतीय न्याय संहिता (भा.न्या.सं.) कलम २२३, ३२४(४) आणि ३(५) अन्वये गुन्हा नोंदवण्यात आला आहे. या प्रकरणाचा पुढील तपास तुळजापूर पोलिस करत आहेत.
