परंडा: ऊसतोडणीसाठी कोयते (मजूर) पुरवण्याचा करार करून लाखो रुपयांची उचल घेतल्यानंतर, मजुरांनाही न पाठवता आणि घेतलेली रक्कमही परत न करता ६ लाख ५० हजार रुपयांची फसवणूक केल्याचा धक्कादायक प्रकार परंडा तालुक्यात समोर आला आहे. याप्रकरणी तब्बल तीन वर्षांनंतर पीडित मुकादमाच्या तक्रारीवरून परंडा पोलीस ठाण्यात फसवणुकीचा गुन्हा दाखल करण्यात आला आहे.
रामेश्वर ज्ञानदेव सावंत (रा. वाकडी, ता. परंडा, जि. धाराशिव) असे गुन्हा दाखल झालेल्या संशयित आरोपीचे नाव आहे. याप्रकरणी धनंजय प्रल्हाद काकडे (वय ४२, रा. तांबेवाडी, ता. भूम, जि. धाराशिव) यांनी परंडा पोलिसांत फिर्याद दिली आहे.
८ कोयत्यांसाठी झाला होता ९.६० लाखांचा करार
पोलिसांनी दिलेल्या माहितीनुसार, फिर्यादी धनंजय काकडे हे ऊसतोडणीचे कंत्राट घेतात. त्यांनी ६ जून २०२३ रोजी तांबेवाडी येथे आरोपी रामेश्वर सावंत याच्याशी ऊसतोडीसाठी मजूर पुरवण्याबाबत करार केला होता. विजय सुदाम राठोड यांच्या समक्ष झालेल्या या करारानुसार, आरोपी रामेश्वरने फिर्यादीला ८ कोयते (ऊसतोड मजूर) पुरवण्याचे कबूल केले होते. यासाठी काकडे यांनी आरोपीला ९ लाख ६० हजार रुपये ॲडव्हान्स (उचल) म्हणून दिले होते.
पैसे थकवून फसवणूक
करार झाल्यानंतर आरोपीने मुदतीत ऊसतोडणीसाठी मजूर पुरवले नाहीत. त्यामुळे फिर्यादी धनंजय काकडे यांनी त्याच्याकडे दिलेल्या पैशांची मागणी लावून धरली. तगादा लावल्यानंतर आरोपी रामेश्वर याने ९ लाख ६० हजार रुपयांपैकी काही रक्कम फिर्यादीला परत केली. मात्र, उर्वरित ६ लाख ५० हजार रुपये देण्यास त्याने साफ नकार दिला. हक्काचे पैसे देण्यास टाळाटाळ करत आरोपीने आपली फसवणूक केल्याचे लक्षात आल्यानंतर काकडे यांनी पोलिसांत धाव घेतली.
परंडा पोलिसांत गुन्हा नोंद
या आर्थिक फसवणुकीप्रकरणी फिर्यादी धनंजय काकडे यांनी शुक्रवार, दि. २९ मे २०२६ रोजी परंडा पोलीस ठाणे गाठून रीतसर तक्रार दिली. त्यांनी दिलेल्या प्रथम खबरीवरून (FIR) आरोपी रामेश्वर सावंत याच्याविरुद्ध भारतीय न्याय संहिता (BNS) कलम ३१८(४) (फसवणूक) अन्वये गुन्हा दाखल करण्यात आला आहे. या प्रकरणाचा पुढील तपास परंडा पोलीस करत आहेत.
