धाराशिव जिल्ह्यात चोरांचा सुळसुळाट! बंद घर फोडून दागिने लंपास; तुळजापुरात मंगळसूत्र चोरणारी महिला रंगेहात पकडली, तर धानुरीमध्ये ज्वारीची चोरी

धाराशिव: जिल्ह्यात चोऱ्यांचे सत्र सुरूच असून बेंबळी, तुळजापूर आणि लोहारा पोलीस ठाण्याच्या हद्दीत चोरीच्या तीन वेगवेगळ्या घटना समोर आल्या आहेत. उमरेगव्हाण येथे बंद घर फोडून ७० हजारांचे दागिने लांबवण्यात आले, तर तुळजापूर बसस्थानकावर एका वृद्ध महिलेचे मंगळसूत्र चोरणाऱ्या महिला चोरटीला प्रवाशांनी रंगेहात पकडले. तिसऱ्या घटनेत लोहारा तालुक्यातील धानुरी येथे चक्क ८० वर्षीय वृद्धाच्या शेतातून २५ हजार रुपयांची ज्वारी चोरून नेल्याचा प्रकार उघडकीस आला आहे.

उमरेगव्हाण येथे बंद घर फोडून ६९ हजारांचे दागिने लंपास 

बेंबळी पोलिसांनी दिलेल्या माहितीनुसार, रमाकांत गोपाळराव कुर्ले (वय ६३, रा. उमरेगव्हाण, ता. जि. धाराशिव) हे २३ मे ते २५ मे या कालावधीत घराला कुलूप लावून बाहेर गेले होते. याच संधीचा फायदा घेऊन अज्ञात चोरट्याने त्यांच्या बंद घराचा कडी-कोंडा तोडून आत प्रवेश केला. चोरट्याने घरातील कपाटाचे कुलूप तोडून आतील १७ ग्रॅम वजनाचे सोन्याचे दागिने (किंमत ६९ हजार ४५० रुपये) चोरून नेले. कुर्ले हे घरी परतल्यानंतर हा घरफोडीचा प्रकार उघडकीस आला.

गुन्हा दाखल: याप्रकरणी फिर्यादी रमाकांत कुर्ले यांनी २९ मे रोजी दिलेल्या तक्रारीवरून बेंबळी पोलीस ठाण्यात अज्ञात चोरट्याविरुद्ध भारतीय न्याय संहिता (BNS) कलम ३३१(३), ३३१(४), ३०५ अन्वये गुन्हा नोंदवला आहे.

तुळजापूर बसस्थानकावर गळ्यातील मंगळसूत्र खेचणारी महिला जेरबंद

अहिल्यानगर जिल्ह्यातील जामखेड येथील रहिवासी मंगल बापू आगाव (वय ६०, रा. सत्यवाडी, ता. जामखेड) या शुक्रवारी (दि. २९ मे) दुपारी दोन वाजेच्या सुमारास तुळजापूर येथील जुन्या बसस्थानक परिसरात आल्या होत्या. बसस्थानकावर असलेल्या गर्दीचा फायदा घेऊन यमुनाबाई सुनील भोसले (वय ३५, रा. धनेगाव, ता. तुळजापूर, जि. धाराशिव) या महिलेने मंगल यांच्या गळ्यातील ३० हजार रुपये किमतीचे ५ ग्रॅम वजनाचे सोन्याचे मणी-मंगळसूत्र अचानक खेचले.

मंगळसूत्र चोरून पळून जात असताना मंगल यांनी आरडाओरडा केला. त्यामुळे परिसरातील नागरिकांनी आणि पोलिसांनी तत्परता दाखवत संशयित महिला चोरटीला मुद्देमालासह रंगेहात पकडले.

गुन्हा दाखल: पीडित मंगल आगाव यांच्या फिर्यादीवरून तुळजापूर पोलिसांनी आरोपी महिला यमुनाबाई भोसले हिच्याविरुद्ध भारतीय न्याय संहिता (BNS) कलम ३०३(२) अन्वये गुन्हा दाखल करून तिला अटक केली आहे.

धानुरी शिवारातून शेतकऱ्याची १५ क्विंटल ज्वारी लंपास; ४ जणांवर गुन्हा

चोरीची तिसरी विचित्र घटना लोहारा तालुक्यातील धानुरी येथे घडली. बलभीम दादाराव साळुंके (वय ८०, रा. धानुरी, ता. लोहारा) या वृद्ध शेतकऱ्याचे धानुरी शिवारात शेत गट नंबर ८६ मध्ये शेत आहे. त्यांनी शेतात काढून ठेवलेली अंदाजे २५ हजार रुपये किमतीची १५ क्विंटल ज्वारी ११ मे रोजी पहाटे चार वाजेच्या सुमारास चोरीला गेली होती.

वृद्ध शेतकऱ्याने केलेल्या चौकशीत गावातीलच काही व्यक्तींनी ही ज्वारी चोरल्याचे समोर आले. त्यानुसार निळकंठ शाहूराज बाबर, ज्ञानेश्वर निळकंठ बाबर, श्रीहरी राजेंद्र बाबर आणि नरहरी राजेंद्र बाबर (सर्व रा. धानुरी, ता. लोहारा) यांनी ही ज्वारी चोरून नेल्याची तक्रार पोलिसांत देण्यात आली.

गुन्हा दाखल: वृद्ध शेतकरी बलभीम साळुंके यांनी २९ मे रोजी लोहारा पोलीस ठाण्यात दिलेल्या प्रथम खबरीवरून गावातीलच चारही आरोपींविरुद्ध भारतीय न्याय संहिता (BNS) कलम ३०३(२) अंतर्गत गुन्हा दाखल करण्यात आला आहे. पोलीस पुढील तपास करत आहेत.