धाराशिव: धाराशिव जिल्ह्यामध्ये अवैध व्यवसायांचे समूळ उच्चाटन करण्यासाठी पोलीस प्रशासनाने आपली मोहीम तीव्र केली आहे. याच मोहिमेअंतर्गत पोलीस प्रशासनाने लातूर-ढोकी रोडवरील अळणी येथील एका बियर बारच्या आडोशाने चालणाऱ्या जुगार अड्ड्यावर धडक कारवाई करत तब्बल २२ लाख रुपयांचा मुद्देमाल जप्त केला आहे. या कारवाईमुळे जिल्ह्यातील अवैध धंदेवाल्यांचे चांगलेच धाबे दणाणले आहेत.
बियर बारच्या आडोशाने सुरू होता जुगार
मिळालेल्या माहितीनुसार, लातूर-ढोकी रोडवर असलेल्या ‘दर्शन बियर बार आणि परमिट रूम’च्या आडोशाने बेकायदेशीररित्या ‘तीन पत्ती’ (तिरट) क्लब चालवला जात होता. या ठिकाणी पैशांच्या बदल्यात कॉईन्स देऊन त्या माध्यमातून मोठ्या प्रमाणावर जुगार खेळवला जात असल्याची खात्रीशीर गोपनीय माहिती परि. पोलीस उपअधीक्षक अमोल मोहिते यांना मिळाली होती. जुगाराचे हे ठिकाण बारच्या पाठीमागे असून चहूबाजूंनी शेताने वेढलेले होते, त्यामुळे ते सहजासहजी कोणाच्याही नजरेस पडत नव्हते.
पोलिसांचे नियोजनबद्ध अॅक्शन प्लॅन
माहिती मिळताच पोलीस अधीक्षक श्रीमती रीतु खोखर आणि अपर पोलीस अधीक्षक सचिन पांडकर यांच्या मार्गदर्शनाखाली पोलिसांनी अत्यंत योजनाबद्ध रीतीने धाड टाकली. पोलिसांची ही छापेमारी इतकी अचानक आणि नियोजनबद्ध होती की, जुगार खेळणाऱ्या संशयितांना तेथून पळून जाण्याची साधी संधीही मिळाली नाही.
या धडक कारवाईत परि. पोलीस उपअधीक्षक अमोल मोहिते यांच्यासह सहाय्यक पोलीस निरीक्षक प्रवीण सोमवंशी, सुरेश कासुळे, पोलीस उपनिरीक्षक रामचंद्र बहुरे तसेच क्यू.आर.टी. (QRT) व आर.सी.पी. (RCP) अंमलदार आणि चालकांच्या पथकाने थेट सहभाग घेतला.
१२ संशयित ताब्यात; २१ लाख ९० हजारांचा मुद्देमाल जप्त
पोलिसांनी या कारवाईदरम्यान घटनास्थळावरून एकूण १२ संशयितांना ताब्यात घेतले आहे. तसेच बार मालक श्रीपाद नारायण वीर याच्याविरुद्ध ‘महाराष्ट्र जुगार प्रतिबंधक अधिनियम, १८८७’ नुसार गुन्हा दाखल करण्यात आला आहे.
जप्त करण्यात आलेला मुद्देमाल:
-
जुगाराचे साहित्य (पत्ते आणि कॉईन्स)
-
मोबाईल फोन
-
२ चारचाकी वाहने
-
४ दुचाकी वाहने
-
एकूण किंमत: रु. २१,९०,३०५/- (एकवीस लाख नव्वद हजार तीनशे पाच रुपये मात्र)
जिल्ह्यातील अवैध धंदे पूर्णपणे बंद करेपर्यंत अशीच कडक कारवाई यापुढेही सुरू राहील, असा इशारा पोलीस प्रशासनाने दिला आहे.
