धाराशिव: येथील शासकीय वैद्यकीय महाविद्यालयाच्या अखत्यारीत असलेल्या स्त्री रुग्णालयात (जिल्हा रुग्णालय) डॉक्टरांच्या हलगर्जीपणामुळे आणि बेजबाबदारपणामुळे एका नवजात बाळाचा मृत्यू झाल्याची धक्कादायक घटना समोर आली होती. याप्रकरणी ‘धाराशिव लाइव्ह’ने सोमवारी वृत्त प्रसिद्ध करून प्रशासनाचे वाभाडे काढले होते. या वृत्ताची तीव्र दखल घेत वैद्यकीय अधिष्ठाता डॉ. शैलेंद्र चौहान यांनी मोठी कारवाई केली असून, संबंधित स्त्री रोग तज्ञ डॉ. तृप्ती राडकर आणि चतुर्थ श्रेणी कर्मचारी सौरभ जाधव या दोघांना तातडीने निलंबित केले आहे.
‘धाराशिव लाइव्ह’च्या बातमीचा मोठा परिणाम
मिळालेल्या माहितीनुसार, तुळजापूर शहरातील प्रसूती कळा येत असलेल्या एका महिलेला या रुग्णालयात दाखल करण्यात आले होते. नातेवाईकांनी संबंधित डॉक्टरांकडे तात्काळ सिझेरियन (सिजर) करण्याची वारंवार विनंती केली होती. मात्र, डॉक्टरांनी याकडे साफ दुर्लक्ष केले. वेळेत सिझर न केल्यामुळेच बाळाचा मृत्यू झाल्याचा गंभीर आरोप नातेवाईकांनी केला होता.
याशिवाय, उपचार करणाऱ्या महिला डॉक्टर आणि एका पुरुष कर्मचाऱ्याने मिळून प्रसूती कळा सोसणाऱ्या मातेला मारहाण केल्याचा अमानुष प्रकारही समोर आला होता. ‘धाराशिव लाइव्ह’ने या संपूर्ण प्रकरणाला वाचा फोडल्यानंतर प्रशासनाला अखेर झुकवे लागले.
चौकशी समितीच्या अहवालानंतर मोठी कारवाई
या घटनेचे गांभीर्य ओळखून आधी प्रभारी अधिष्ठाता डॉ. स्वाती पांढरे यांनी २४ तासांत अहवाल सादर करण्यासाठी एक विशेष चौकशी समिती स्थापन केली होती. या चौकशी समितीच्या अहवालानंतर आणि ‘धाराशिव लाइव्ह’च्या दणक्यानंतर वैद्यकीय अधिष्ठाता डॉ. शैलेंद्र चौहान यांनी ही निलंबनाची कडक कारवाई केली आहे.
दोषींवर निलंबनाची कुऱ्हाड:
डॉ. तृप्ती राडकर (स्त्री रोग तज्ञ) – कर्तव्यात कसूर आणि हलगर्जीपणा केल्याबद्दल निलंबित.
सौरभ जाधव (चतुर्थ श्रेणी कर्मचारी) – गैरवर्तणूक आणि मारहाणीच्या आरोपावरून निलंबित.
नातेवाईकांच्या आंदोलनाला यश
बाळ दगावल्यामुळे आणि मातेला झालेल्या मारहाणीमुळे संतप्त झालेल्या नातेवाईकांनी रुग्णालयातच ठिय्या आंदोलन सुरू केले होते. “दोषींवर कडक कारवाई झाल्याशिवाय आम्ही इथून हलणार नाही,” असा पवित्रा पीडित बाळाच्या नातेवाईक प्रीती कदम आणि इतर कुटुंबीयांनी घेतला होता. अखेर मुख्य दोषी डॉक्टर आणि कर्मचाऱ्याचे निलंबन झाल्याने नातेवाईकांच्या या लढ्याला आणि ‘धाराशिव लाइव्ह’च्या मोहिमेला मोठे यश आले आहे.
या कारवाईमुळे शासकीय रुग्णालयातील बेजबाबदार डॉक्टरांचे धाबे दणाणले असून, भविष्यात अशा घटना रोखण्यासाठी प्रशासनाने अधिक कडक पावले उचलण्याची गरज निर्माण झाली आहे.
