मुरुम : कत्तलीसाठी बेकायदेशीररीत्या वाहतूक करण्यात येत असलेल्या ११ म्हशींची मुरुम पोलिसांनी सुटका केली असून, या प्रकरणी एका व्यक्तीविरुद्ध गुन्हा दाखल करण्यात आला आहे. कारवाईदरम्यान जनावरे व वाहन असा ५ लाख ८० हजार रुपयांचा मुद्देमाल जप्त करण्यात आला.
पोलिसांनी दिलेल्या माहितीनुसार, मंहमद फिरोज बाडेवाले (वय ३५, रा. नळदुर्ग, ता. तुळजापूर) हा टेम्पो क्रमांक एमएच २५ एजे ५२७५ मधून ११ म्हशींची वाहतूक करीत होता. सोमवारी (८ जून) रात्री सुमारे ८.४७ वाजण्याच्या सुमारास भोसगी शिवारातील आष्टामोड येथे राष्ट्रीय महामार्ग क्रमांक ६५ च्या सर्व्हिस रोडवरील बिराज बेकरीसमोर मुरुम पोलिसांच्या पथकाने वाहनाची तपासणी केली.
तपासणीदरम्यान म्हशींची कोणतीही योग्य चारा व पाण्याची व्यवस्था न करता त्यांना निर्दयतेने कोंबून कत्तलीसाठी नेले जात असल्याचे निदर्शनास आले. पोलिसांनी तत्काळ वाहन ताब्यात घेत जनावरांची सुटका केली.
या कारवाईत ८० हजार रुपये किमतीच्या ११ म्हशी आणि ५ लाख रुपये किमतीचा टेम्पो असा एकूण ५ लाख ८० हजार रुपयांचा मुद्देमाल जप्त करण्यात आला.
याप्रकरणी मुरुम पोलीस ठाण्यात प्राण्यांना क्रूरतेने वागणूक प्रतिबंध अधिनियम १९६० मधील कलम ११(१)(अ), (ड), (एच), महाराष्ट्र प्राणी संरक्षण अधिनियमातील कलम ५(अ), ५(ब), ९ तसेच संबंधित कायद्यांन्वये गुन्हा नोंदविण्यात आला आहे.मुरुम पोलीस या प्रकरणाचा पुढील तपास करीत आहेत.
