धाराशिव: रुम भाड्याने मिळवून देण्याच्या बहाण्याने एका ३४ वर्षीय महिलेला हॉटेलवर नेऊन, तिच्या शितपेयामध्ये मद्य (दारू) मिसळून तिच्यावर लैंगिक अत्याचार केल्याची धक्कादायक घटना समोर आली आहे. याप्रकरणी धाराशिव शहर पोलीस ठाण्यात एका तरुणाविरुद्ध अत्याचार आणि ॲट्रॉसिटी कायद्यांतर्गत गुन्हा दाखल करण्यात आला आहे.
मिळालेल्या माहितीनुसार, पीडित ३४ वर्षीय महिला ९ जून रोजी दुपारी चारच्या सुमारास एका गावात आली होती. तेथे आरोपी तरुणाने तिला ‘तुला राहण्यासाठी रुम भाड्याने करून देतो’ असे आमिष दाखवले. त्यानंतर त्याने महिलेला आधी आपल्या म्हशीच्या गोठ्यावर बोलावून घेतले. ‘आपण जेवण करायला जाऊ’ असे सांगत त्याने तिला एका हॉटेलवर नेले.
हॉटेलमध्ये गेल्यानंतर आरोपीने पीडितेच्या नकळत तिच्या शितपेयामध्ये (कोल्ड्रिंक) मद्य मिक्स केले. हे पेय प्यायल्यानंतर महिलेची प्रकृती खालावली, याचाच गैरफायदा घेत आरोपीने तिच्यावर लैंगिक अत्याचार केला.
याप्रकरणी पीडित महिलेने १० जून रोजी धाराशिव शहर पोलीस ठाण्यात रीतसर तक्रार दिली. तिच्या प्रथम खबरेवरून (FIR) पोलिसांनी आरोपीविरुद्ध भारतीय न्याय संहिता (BNS) कलम ६४(२), (i), (L), ११५(२) सह अनुसूचित जाती-जमाती अत्याचार प्रतिबंधक कायदा (ॲट्रॉसिटी) कलम ३(१)(w), (i), (ii), ३(२)(v), ३(१)(r)(s) अन्वये गुन्हा नोंदवला आहे.
घटनेचे गांभीर्य ओळखून पोलिसांनी तात्काळ तपासाची चक्रे फिरवली असून, पुढील तपास धाराशिव पोलीस करत आहेत. (पीडितेची ओळख गोपनीय ठेवण्यात आली आहे.)
