परंडा: लोकांच्या जीवितास धोका निर्माण होईल अशा पद्धतीने विनापरवाना व बेकायदेशीररीत्या एअर पिस्टल बाळगल्याप्रकरणी परंडा पोलिसांनी रोसा (ता. परंडा) येथे छापा टाकून एकाच कुटुंबातील चौघांविरुद्ध शस्त्र कायद्यांतर्गत गुन्हा दाखल केला आहे. पोलिसांनी घटनास्थळावरून एअर पिस्टल जप्त केले आहे.
गणेश संतोष नलावडे, संतोष नलावडे, शोभा संतोष नलावडे आणि महादेव संतोष नलावडे (सर्व रा. रोसा, ता. परंडा, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी परंडा पोलीस ठाण्याचे पोलीस नाईक श्रीकांत अरुण भांगे यांनी सरकारतर्फे फिर्याद दिली आहे.
गवतामध्ये लपवले होते एअर पिस्टल
पोलीस सूत्रांकडून मिळालेल्या माहितीनुसार, मंगळवारी (दि. ९ जून) रात्री साडेअकरा वाजेच्या सुमारास रोसा शिवारात आरोपींच्या राहत्या घराच्या पाठीमागे असलेल्या गिनीगोल गवतात काहीतरी संशयास्पद हालचाल सुरू असल्याची माहिती परंडा पोलिसांना मिळाली होती. त्यानुसार पोलीस पथकाने तातडीने त्या ठिकाणी छापा टाकला.
या छाप्यात आरोपींकडे विनापरवाना व बेकायदेशीररीत्या बाळगलेले एक एअर पिस्टल मिळून आले. हे शस्त्र लोकांच्या जीवितास धोका निर्माण होईल अशा पद्धतीने आणि कोणतीही कायदेशीर परवानगी नसताना बाळगण्यात आले होते. तसेच आरोपींनी धाराशिवच्या जिल्हाधिकाऱ्यांनी जारी केलेल्या शस्त्रबंदी आदेशाचे उघडपणे उल्लंघन केल्याचे तपासात समोर आले. पोलिसांनी ते एअर पिस्टल जागीच जप्त केले आहे.
शस्त्र कायद्यान्वये गुन्हा दाखल
जिल्हाधिकाऱ्यांच्या आदेशाचा अवमान करून बेकायदेशीर शस्त्र बाळगल्याप्रकरणी पोलीस नाईक श्रीकांत भांगे यांनी दिलेल्या प्रथम खबरेवरून (एफआयआर) परंडा पोलीस ठाण्यात आरोपींविरुद्ध शस्त्र कायदा (अार्म्स ॲक्ट) कलम ३ आणि २५ अन्वये गुन्हा नोंदवण्यात आला आहे. या प्रकरणाचा पुढील तपास परंडा पोलीस करत आहेत.
