धाराशिव: धाराशिव जिल्ह्यात चोरीच्या घटनांमध्ये मोठी वाढ झाली असून, वेगवेगळ्या भागात केबल, दुचाकी, डिझेल आणि तब्बल तीन लाख रुपये किमतीची ॲल्युमिनियमची तार चोरीला गेल्याचे समोर आले आहे. याप्रकरणी शिराढोण, वाशी, नळदुर्ग आणि आनंदनगर पोलीस ठाण्यात गुन्हे दाखल करण्यात आले असून, पोलीस चोरट्यांचा शोध घेत आहेत.
पहिली घटना: कळंब तालुक्यात शेतातील केबल वायरची चोरी; आरोपी निष्पन्न
कळंब तालुक्यातील हिंगणगाव शिवारातील शेत गट नंबर ८७/४/०२ मधून २५ हजार रुपये किमतीची २५० फूट केबल वायर चोरीला गेल्याची घटना घडली. मंगळवारी (दि. ९ जून) रात्री साडेदहा वाजेच्या सुमारास ही चोरी झाली. याप्रकरणी शेतकरी दत्तात्रय कारभारी डोंगरे (वय ४६, रा. कोथळा, ता. कळंब) यांनी दिलेल्या फिर्यादीवरून संशयित आरोपी रणजित सुभाष पवार (रा. करंजकल्ला, ता. कळंब) याच्याविरुद्ध शिराढोण पोलीस ठाण्यात भारतीय न्याय संहिता (BNS) कलम ३०३(२) अन्वये गुन्हा दाखल करण्यात आला आहे.
दुसरी घटना: वाशी तालुक्यात घरासमोरून दुचाकी लंपास
वाशी तालुक्यातील दळवेवाडी येथे घरासमोर पार्क केलेली ६० हजार रुपये किमतीची हिरो स्प्लेंडर प्लस मोटरसायकल (क्र. एमएच २५ बीजी ८२९५) अज्ञात चोरट्याने पळवून नेली. ही घटना ३ जूनच्या रात्री ते ४ जूनच्या सकाळच्या दरम्यान घडली. याप्रकरणी ओम कालिदास दळवे (वय १९, रा. दळवेवाडी) या तरुणाने बुधवारी (दि. १० जून) वाशी पोलीस ठाण्यात फिर्याद दिली असून, पोलिसांनी अज्ञात चोरांविरुद्ध गुन्हा नोंदवला आहे.
तिसरी घटना: नळदुर्ग परिसरात पॉवर प्रोजेक्टची ३ लाखांची तार चोरीला
नळदुर्ग पोलीस ठाण्याच्या हद्दीत सराटी येथील शेत गट क्र. ५७ आणि केशेगाव येथील शेत गट क्र. २३२ मधील ‘बी.एन.सी. पॉवर प्रोजेक्ट्स लिमिटेड पुणे’ या कंपनीची ८०० मीटर ॲल्युमिनियमची तार अज्ञात चोरट्यांनी कापून नेली. चोरून नेलेल्या तारेची एकूण किंमत ३ लाख रुपये आहे. ही चोरी ३१ मे ते १ जून दरम्यान झाली. कंपनीचे सुपरवायझर विजय लाला गायकवाड (रा. सोलापूर) यांनी १० जून रोजी दिलेल्या तक्रारीवरून नळदुर्ग पोलिसांत अज्ञात चोरट्यांविरुद्ध गुन्हा दाखल करण्यात आला आहे.
चौथी घटना: धाराशिवमध्ये टँकरमधून डिझेल आणि सर्व्हिस किट चोरणारे उत्तर प्रदेशचे दोघे गजाआड
धाराशिव शहरातील समतानगर भागात उभ्या असलेल्या टँकरच्या (क्र. एमएच ०४ एचडी १४९७) कॅबिनमधून रोड बनवण्याच्या मशीनची सर्व्हिस किट आणि ८० लीटर डिझेल, असा एकूण ८१ हजार ५३४ रुपयांचा मुद्देमाल चोरट्यांनी लांबवला. ही घटना ९ जून रोजी रात्री घडली.
याप्रकरणी दत्ताप्रसाद उत्तरेश्वर भोसले (वय ४७, रा. रउळगाव, ता. बार्शी, जि. सोलापूर) यांनी आनंदनगर पोलीस ठाण्यात तक्रार दिली होती. पोलिसांनी तातडीने तपास करत चोरीप्रकरणी संशयित आरोपी मुनीशकुमार राजेशकुमार मिश्रा आणि गॅनचंद्र सत्यवीर (दोघे रा. शहाजहानपूर, उत्तर प्रदेश, सध्या रा. धाराशिव) यांच्याविरुद्ध बीएनएस कलम ३०६ अन्वये गुन्हा दाखल केला आहे.
