धाराशिव: धाराशिव ग्रामीण पोलीस ठाण्याच्या हद्दीतील कावलदरा परिसरामध्ये एक भीषण अपघात घडला आहे. वेगात असलेल्या किया सोनेट कारने रस्त्याच्या डिव्हायडरला जोरदार धडक दिल्याने एका तरुणाचा दुर्दैवी मृत्यू झाला, तर अन्य एक तरुण गंभीर जखमी झाला आहे. कारचालकाने अत्यंत हयगयीने आणि निष्काळजीपणे गाडी चालवल्याने हा जीवघेणा अपघात घडल्याचे समोर आले असून, धाराशिव ग्रामीण पोलीस ठाण्यात चालकाविरुद्ध गुन्हा नोंदवण्यात आला आहे.
कावलदरा येथील अनुराधा मंगल कार्यालयासमोर अपघात
पोलिसांकडून मिळालेल्या माहितीनुसार, आरोपी कारचालक ज्ञानेश्वर नारायण काळे, फिर्यादी शंकर राजू काळे (वय २६ वर्षे, रा. सारवाडी, ता. जि. धाराशिव) आणि मयत चक्रधर दत्ता कव्हळे हे तिघे १४ जुलै २०२६ रोजी मध्यरात्री १:०० वाजण्याच्या सुमारास किया सोनेट कारने (क्रमांक MH-21 CG-2895) जात होते.
कार कावलदरा येथील अनुराधा मंगल कार्यालयासमोर आली असता, चालक ज्ञानेश्वर काळे याचे कारवरील नियंत्रण सुटले. त्याने कार अत्यंत वेगाने, हयगयीने आणि निष्काळजीपणे चालवून थेट रस्त्याच्या दुभाजकाला (डिव्हायडरला) जोरात धडक दिली.
तरुणाचा उपचारादरम्यान मृत्यू; चालक निष्काळजीपणाने कार चालवत असल्याचा आरोप
ही धडक एवढी भीषण होती की कारचा पुढचा भाग चक्काचूर झाला. अपघातात चक्रधर दत्ता कव्हळे हे गंभीर जखमी झाले. त्यांना तातडीने उपचारासाठी रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. तर कारमधील शंकर काळे हे गंभीर व किरकोळ जखमी झाले आहेत.
धाराशिव ग्रामीण पोलिसांत गुन्हा दाखल
अपघातातून सावरल्यानंतर जखमी शंकर राजू काळे यांनी २१ जुलै २०२६ रोजी धाराशिव ग्रामीण पोलीस ठाणे गाठून अपघातास कारणीभूत ठरलेल्या चालकाविरुद्ध तक्रार दिली. त्यांच्या प्रथम खबरीवरून (FIR) पोलिसांनी गुन्हा नोंदवला आहे:
-
आरोपी चालकाचे नाव: ज्ञानेश्वर नारायण काळे.
-
दाखल कलमे: धाराशिव ग्रामीण पोलिसांनी आरोपी चालकाविरुद्ध भारतीय न्याय संहिता (BNS) कलम १०६(१) (निष्काळजीपणामुळे मृत्यू घडवून आणणे), २८१ (सार्वजनिक रस्त्यावर वेगाने वा निष्काळजीपणे वाहन चालवणे), १२५(ए)(बी) (दुसऱ्याच्या जीवाला धोक्यात आणून गंभीर दुखापत करणे) अन्वये गुन्हा नोंदवला आहे.
या भीषण अपघाताचा पुढील सखोल तपास धाराशिव ग्रामीण पोलीस ठाण्याचे अधिकारी करत आहेत.
