येरमाळ्याच्या सुपुत्राचा जागतिक डंका; अमेरिकेत १८०९ एकर आधुनिक शेती, ४०० कोटींच्या कृषी संशोधन कंपनीचे नेतृत्व

धाराशिव |  कळंब तालुक्यातील येरमाळा येथील सुपुत्र डॉ. बालाजी आगलावे यांनी अमेरिकेतील आधुनिक शेती, कृषी संशोधन आणि अॅग्रीटेक क्षेत्रात भरीव यश संपादन करत महाराष्ट्राचा गौरव जागतिक पातळीवर वाढवला आहे. जिद्द, ज्ञान आणि अथक परिश्रम यांच्या जोरावर त्यांनी अमेरिकेत १८०९ एकरांवर अत्याधुनिक शेती उभी केली असून, सुमारे ४०० कोटी रुपयांची वार्षिक उलाढाल असलेल्या कृषी संशोधन कंपनीचे नेतृत्व ते करत आहेत.

डॉ. आगलावे यांचे प्राथमिक शिक्षण दहिफळ येथील जिल्हा परिषद शाळेत, माध्यमिक शिक्षण येरमाळा येथे झाले. त्यानंतर त्यांनी परभणी येथून बी.एस्सी. व एम.एस्सी. (कृषी) पदवी संपादन केली. नागपूर येथील एनआरसीसीमध्ये उच्च शिक्षण घेतल्यानंतर त्यांनी संशोधन क्षेत्रात स्वतःची वेगळी ओळख निर्माण केली.

सन २००९ मध्ये अमेरिकेतील AG Metrics या कंपनीत सायंटिस्ट म्हणून त्यांनी कारकिर्दीची सुरुवात केली. संशोधनातील कौशल्य आणि नेतृत्वगुणांच्या जोरावर २०१२ मध्ये प्रिन्सिपल सायंटिस्ट, २०१५ मध्ये डायरेक्टर आणि २०१६ मध्ये कंपनीचे प्रमुख म्हणून त्यांची नियुक्ती झाली. त्यांच्या कार्यपद्धतीवर विश्वास ठेवून कंपनीच्या मूळ मालकांनी संपूर्ण जबाबदारी त्यांच्याकडे सोपवली.

सध्या त्यांच्या नेतृत्वाखाली १७० वैज्ञानिक कार्यरत असून, कंपनीकडे १६ आंतरराष्ट्रीय पेटंट आहेत. डॉ. आगलावे यांनी १०० हून अधिक संशोधन निबंध प्रकाशित केले असून त्यांच्या दोन पुस्तकांना आंतरराष्ट्रीय स्तरावरही मोठी मागणी आहे. कंपनी विकसित करत असलेली जैविक खते आणि कृषी उत्पादने वॉलमार्ट व अॅमेझॉनसारख्या जागतिक बाजारपेठांमध्ये विक्रीसाठी उपलब्ध आहेत.

अवघ्या २० एकरांपासून सुरू झालेला प्रवास आज १८०९ एकरांवरील आधुनिक शेतीपर्यंत पोहोचला आहे. त्यांच्या शेतात आंबा, संत्री, मोसंबी, लिंबू, द्राक्षे, ऊस, शेवगा, फणस, सीताफळ, कडीपत्ता, टोमॅटो, कलिंगड आणि विविध पालेभाज्यांचे उत्पादन घेतले जाते. विशेष म्हणजे, अमेरिकेत केशर आणि हापूस आंब्यांची लागवड करून भारतीय आंब्यांना नवी ओळख मिळवून देण्यात त्यांनी यश मिळवले आहे. त्यांच्या शेतातील एक आंबा ५०० ते ७०० रुपयांना विकला जात असल्याचे सांगितले जाते.

कंपनीमध्ये विकसित होणारी कीटकनाशके आणि जैविक खते यांची गुणवत्ता प्रयोगशाळा, ग्रीनहाऊस आणि प्रत्यक्ष शेतात तपासली जाते. तसेच “ग्रीन झोन” या ब्रँडअंतर्गत कोल्ड प्रेस तंत्रज्ञानाचा वापर करून तयार केलेले फळांचे ज्यूस अमेरिकन बाजारात विक्रीसाठी उपलब्ध आहेत. कडीपत्त्याच्या अर्कापासून तयार केलेल्या जैविक कीटकनाशकाला अमेरिकन सरकारची मान्यता मिळाल्याने पर्यावरणपूरक शेतीसाठी हा महत्त्वाचा टप्पा मानला जात आहे.

यशाच्या शिखरावर पोहोचल्यानंतरही डॉ. आगलावे यांनी सामाजिक बांधिलकी जपली आहे. भारतातून शिक्षणासाठी अमेरिकेत जाणाऱ्या विद्यार्थ्यांना ते दोन वर्षे मोफत निवास, पार्ट-टाईम रोजगाराच्या संधी आणि आवश्यक मार्गदर्शन उपलब्ध करून देत आहेत.

अलीकडेच आमदार कैलास पाटील आणि आमदार अभिजित पाटील   यांनी डॉ. बालाजी आगलावे यांच्या संशोधन केंद्राला आणि अत्याधुनिक शेतीला भेट दिली. या भेटीदरम्यान आधुनिक तंत्रज्ञान, संशोधनाची व्याप्ती आणि वैज्ञानिक पद्धतीने विकसित केलेली शेती पाहून त्यांनी डॉ. आगलावे यांच्या कार्याचे कौतुक केले.

येरमाळ्यासारख्या ग्रामीण भागातून शिक्षण घेतलेल्या एका युवकाने संशोधन, उद्योग आणि आधुनिक शेतीच्या बळावर अमेरिकेत जागतिक स्तरावर यश संपादन करणे ही केवळ वैयक्तिक उपलब्धी नसून महाराष्ट्रासाठी अभिमानाची बाब आहे. ज्ञान, परिश्रम आणि चिकाटीच्या जोरावर जग जिंकता येते, याचा प्रेरणादायी आदर्श डॉ. बालाजी आगलावे यांनी घालून दिला आहे.