धाराशिव जिल्ह्यातील भूम, तुळजापूर आणि नळदुर्ग पोलीस ठाण्यांच्या हद्दीत चोरीच्या चार वेगवेगळ्या घटना उघडकीस आल्या आहेत. या घटनांमध्ये सोन्याचे दागिने, दुचाकी, मशिनरीचे साहित्य आणि डिझेल असा एकूण ४ लाख ३१ हजार रुपयांपेक्षा अधिक किमतीचा मुद्देमाल चोरीला गेला आहे. याप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
घरात घुसून दागिन्यांची जबरी चोरी
भूम तालुक्यातील हाडोंग्री येथे शेतातील घरात घुसून अज्ञात व्यक्तीने दागिन्यांची जबरी चोरी केली. प्रसाद परमेश्वर वाघमारे (वय ३३, रा. हाडोंग्री) यांच्या फिर्यादीनुसार, २ ऑगस्ट रोजी रात्री १२.३० ते १२.५८ वाजण्याच्या सुमारास अज्ञात व्यक्तीने घराचा मेन दरवाजा लोखंडी पाराने तोडून आत प्रवेश केला.
यावेळी फिर्यादी प्रसाद वाघमारे व सुनिता गणगे यांना, “सोने व पैसे कुठे आहेत, सांगा; नाहीतर तुम्हाला जिवे ठार मारू,” अशी धमकी देण्यात आली. त्यानंतर अज्ञात व्यक्तीने २० ग्रॅम वजनाचे सुमारे १ लाख ६० हजार रुपये किमतीचे सोन्याचे दागिने जबरीने चोरून नेले.
याप्रकरणी प्रसाद वाघमारे यांनी ७ ऑगस्ट रोजी दिलेल्या फिर्यादीवरून भूम पोलीस ठाण्यात भा.न्या.सं. कलम ३०९(४), ३३१(४), ३(५) अन्वये गुन्हा दाखल करण्यात आला आहे.
तुळजापूरमध्ये मशिनरीचे साहित्य चोरीला
तुळजापूर खुर्द नगरपरिषद शाळेजवळ ठेवलेल्या मशिनरीमधून विविध साहित्य चोरीला गेल्याची घटना समोर आली आहे. स्वप्निल सुभाष चव्हाण (वय ३४, रा. दयानंदनगर, नळदुर्ग रोड, तुळजापूर) यांच्या फिर्यादीनुसार, सर्व्हेइंग ऑटो लेव्हल मशीनची लेन्स, एल अँड टी डबल ड्रम रोलरमधील ७० लिटर डिझेल, केस रोलरमधील हायड्रॉलिक ऑईल, सोनिक कंपनीची १०० ए बॅटरी आणि एक्साईड कंपनीची १०० ए बॅटरी असा एकूण ६६ हजार रुपये किमतीचा मुद्देमाल अज्ञात चोरट्याने लंपास केला.
याप्रकरणी ७ ऑगस्ट रोजी तुळजापूर पोलीस ठाण्यात भा.न्या.सं. कलम ३०३(२) अन्वये गुन्हा नोंदवण्यात आला आहे.
केशेगावातून बजाज पल्सर चोरीला
नळदुर्ग पोलीस ठाण्याच्या हद्दीतील केशेगाव येथे घरासमोर उभी केलेली बजाज पल्सर मोटारसायकल चोरीला गेली. प्रताप अजय शिवकर (वय २१, रा. केशेगाव, ता. तुळजापूर) यांची सुमारे ६५ हजार रुपये किमतीची बजाज पल्सर (एमएच २५ बीसी ८६१८) ही ३१ जुलै रोजी रात्री ११.३० ते १ ऑगस्ट रोजी पहाटे ४.३० वाजण्याच्या दरम्यान त्यांच्या घरासमोरून अज्ञात व्यक्तीने चोरून नेली.
याबाबत ७ ऑगस्ट रोजी नळदुर्ग पोलीस ठाण्यात भा.न्या.सं. कलम ३०३(२) अन्वये गुन्हा दाखल करण्यात आला आहे.
बसमध्ये चढताना महिलेच्या गळ्यातील दागिने लंपास
भूम बसस्थानकावर गर्दीचा फायदा घेत महिलेच्या गळ्यातील सोन्याचे दागिने चोरीला गेल्याची घटना घडली. सविता राजेंद्र जाधव (वय ४४, रा. वाळवणे, ता. पारनेर, जि. अहिल्यानगर) या पतीसह १६ जुलै रोजी दुपारी १२.१५ वाजता बार्शीकडे जाणाऱ्या बसमध्ये चढत असताना अज्ञात व्यक्तीने त्यांच्या गळ्यातील १६.५० ग्रॅम वजनाचे सोन्याचे दागिने चोरून नेले.
चोरी गेलेल्या दागिन्यांची किंमत सुमारे १ लाख ४० हजार रुपये आहे. सविता जाधव यांनी ७ ऑगस्ट रोजी दिलेल्या फिर्यादीवरून भूम पोलीस ठाण्यात भा.न्या.सं. कलम ३०३(२) अन्वये गुन्हा दाखल करण्यात आला आहे.
चारही प्रकरणांत अज्ञात चोरट्यांविरुद्ध गुन्हे दाखल झाले असून, संबंधित पोलीस ठाण्यांकडून पुढील तपास सुरू आहे.
