धाराशिव कृषी निविष्ठा घोटाळा: १४ अधिकाऱ्यांचे निलंबन, मात्र २९ शेतकरी उत्पादक आणि २ निर्मिती कंपन्यांना ‘राजाश्रय’

धाराशिव: धाराशिव जिल्ह्यातील कोट्यवधी रुपयांच्या कृषी निविष्ठा (Agriculture Inputs) घोटाळ्याप्रकरणी कृषी विभागातील १४ अधिकाऱ्यांवर निलंबनाची कारवाई करण्यात आली आहे. त्यांच्यावर शिस्तभंग आणि सामूहिक विभागीय चौकशी सुरू करण्यात आली असली तरी, या घोटाळ्यात अधिकाऱ्यांशी संगनमत असलेल्या २९ शेतकरी उत्पादक कंपन्या (FPC) आणि २ निर्मिती कंपन्यांना मात्र ‘राजाश्रय’ मिळत असल्याचा संतापजनक प्रकार समोर आला आहे.

एकात्मिक कीड व्यवस्थापन (IPM) आणि एकात्मिक अन्नद्रव्य व्यवस्थापन (INM) कार्यक्रमांतर्गत लाभार्थ्यांना निविष्ठा वाटप करताना मोठा भ्रष्टाचार झाला आहे. वैयक्तिक शेतकरी किंवा शेतकरी गटांना प्राधान्य देण्याऐवजी शेतकरी कंपन्यांना झुकते माप दिले गेले.

चौकशीत अनेक धक्कादायक बाबी उघडकीस आल्या आहेत:

लातूर विभागाचे कृषी सहसंचालक महेशकुमार तीर्थकर यांनी संबंधित १४ अधिकाऱ्यांचे निलंबन करून विभागीय चौकशीचे आदेश दिले आहेत. या अधिकाऱ्यांचे मुख्यालय लातूर येथे हलवण्यात आले असून त्यांना १० दिवसांच्या आत म्हणणे मांडण्याचे आदेश देण्यात आले आहेत. मात्र, अधिकाऱ्यांना बळीचा बकरा बनवून, खोटे रेकॉर्ड तयार करणाऱ्या आणि शासनाला चुना लावणाऱ्या शेतकरी कंपन्यांना अभय का दिले जात आहे, असा सवाल उपस्थित होत आहे. या सर्व प्रकारात फौजदारी गुन्हे दाखल करण्याची मागणी जोर धरत आहे.

सोलपूर जिल्ह्यातील मोहोळ येथील ‘स्टार फर्टिलायझर अँड पेस्टीसाईड’ आणि धाराशिवमधील मंगरूळ येथील ‘कृषी जगत फार्मर प्रोड्युसर कंपनी’ या दोन निर्मिती कंपन्यांकडून सर्व तालुक्यांत निविष्ठा खरेदी केल्या गेल्या. कृषी जगत कंपनीला तर लाखो रुपयांची रक्कम रोखीने आगाऊ (Advance) देण्यात आली, ज्याची नियमात कोणतीही तरतूद नाही. तसेच, धाराशिव, लोहारा, कळंब, परंडा, तुळजापूर आणि उमरगा तालुक्यातील जवळपास २९ शेतकरी उत्पादक कंपन्यांनी या बोगस वाटपात सहभाग घेतल्याचे उघड झाले आहे.